संघीयतां देय् विभाजन जुइफु

ख्वप (सन्ध्या टाइम्स)/ नीगुंगूगु नेपालभाषा साहित्य तःमुँज्या ११ वडास्थित त्रिपुरा सुन्दरीइ त्वाः थकालि ९४ दँया बिकुलाल त्वाय्नाबासुं उलेज्या यानादिल। ज्याझ्वलय् नेमकिपाया अध्यक्ष नारायणमान बिजुक्छेँ रोहितं जातजाति व भाषाभाषीया आधारय् राज्य दयेकल धाःसा देशय् रक्तपात जुइफु धयादिल। सछि स्वयां अप्वः जाति व भाषा दुगु देशय् थुकिया आधारय् राज्य निर्माण सम्भव मदुगुलिं हिमाल, पहाड व तराईया भूगोलया आधारय् राज्यया विभाजन दकलय् बांलाइगु खँ वय्कलं कनादिल। ज्याझ्वलय् प्रजग कोरियाया राजदूत जाङ योङ चोलं अमेरिकी साम्राज्यवाद विरुद्धया संघर्ष व कोरिया पुनः एकीकरणया पक्षय् ख्वपया जनतां क्यंगु समर्थन प्रति आभार प्वंकादिल ।

पुलांम्ह सभामुख दमननाथ ढुंगानां देशयात स्वंगू तःधंगु दलया आन्तरिक संघर्षय् तक्यंके मजिउ धासें थीथी राष्ट्रया विरोध यानाः छुं नं राष्ट्रया हित जुइ मखु धयादिल। नेपाल बार एशोसियसनया अध्यक्ष विश्वकान्त मैनालीं छुं नं भाषा, जाति व संस्कृति देशया निधि खः धयादिल। संविधानविद् डा. भीमार्जुन आचार्यं संघात्मक शासन प्रणालीं देश विभाजन जुइफुगु खँ कनादिल। सभासद् लीला न्याइच्याईं नेमकिपा नागरिकता विधेयकया विषक्षय् जूगु खँ कनादिल। भाषाथुवाः रमापतिराज शर्मां खय् भाषाय् नं नेपालभाषाया गाक्कं प्रभाव दुगु खँ कनादिल। किसान नेता गोविन्द दुवालं कम्युनिष्टत जात मखु वर्गया आधारय् न्ह्यचिली धयादिल। जलश्रोत विश्लेषक रत्नसंसार श्रेष्ठं संघीयता हे समस्या ज्यंकेगु अचुक उपाय मखु धयादिल ।

आदर्श आजाद उच्च माविया प्राचार्य नाति कवांया सभापतित्वय् जूगु ज्याझ्वलय् वरिष्ठ अभिवक्ता बालकृष्ण न्यौपाने, चन्द्रबहादुर उलक, चन्द्रप्रसाद ढकाल, रमिन्द्र सुवाल, रमेश भण्डारी, कृष्णप्रसाद दुवाल, बाबुराम महर्जन, इन्द्रमान रंजित, दिवस थापा नापं न्हूपिं पुलांपिं च्वमि साहित्यकारपिंसं रचना पाठ यानादीगु खःसा बहनी सांस्कृतिक ब्वज्या जूगु खः। म्हिगः चैत्यरत्न शाक्यं थः मांआबुया नामय् नीस्वंगु झिद्वः व छतका दामय् तःमुँज्यापाखें नं झिद्वः व छतका दां तयाः अक्षयकोष स्वंगु खः। तःमुँज्या थौं नं जारी दनि ।