पशुपतिया बुद्ध मूर्ति गायब !
येँ (सन्ध्या टाइम्स)/ पशुपति लागाया राजराजेश्वरी घाटय् च्वंगु छगू बुद्ध मूर्ति आकाझाकां गायब जूगु खनाः स्थानीय जनता अजूचाःगु दु। वंगु मोहनिया चान्हय्पाखे उगु मूर्ति गायब जूगु खः ।
स्थानीय मनूतय्सं धाः कथं पशुपति विकास कोष थःहे वयाः चान्हय् उगु मूर्ति ल्ह्वना यंकूगु खः। विकास कोषं छाय् मूर्ति ल्ह्वना यंकल थें धकाः कोषया कोषाध्यक्ष नरोत्तम वैद्ययात स्वापू तयाबलय् वय्कलं मूर्ति थःपिंसं यंकागु खँ स्वीकार यानादिल। उगु मूर्तिया बारे अनुसन्धान यायेगु लागिं थःपिंसं मूर्ति उत्खनन् यानागु जानकारी वय्कलं बियादिल ।
डा. गोविन्द टण्डनं च्वयातःगु छगू सफुली उगु मूर्ति वहे थासय् स्थापना यानातःगु मखुसें खुसिं चुइका हःगु मूर्तियात कयाः अन अथें च्वयातःगु खः धकाः च्वयातःगु दु। आः उत्खनन्या झ्वलय् नं मूर्तिया आसन मदुगु व छुं शिलापत्र नं मलूगु कारणं उगु मूर्ति अन हे पलिस्था यानातःगु मखु धइगु हे पुष्टि जूगु जानकारी नं भाजु वैद्यं बियादिल ।
आः उत्खनन्या ज्या क्वचायेधुंकूगुलिं मूर्तियात अन हे पलिस्था यानाः देगः समेत दना बीगु ग्वसाः जुयाच्वंगु खँ नं भाजु वैद्यं कनादीगु दु। करिब ४ फिट तजाःगु उगु मूर्ति खुगूगु शताव्दीपाखेयागु जुइमाः धइगु अनुमान यानातःगु दु ।
कोषपाखें थज्याःगु लिसः बिउसां स्थानीय जनतां धाःसा उत्खनन्या लागिं मूर्ति हे छाय् ल्ह्वना यंकेमाल थें धकाः शंकापूर्ण न्ह्यसः धाःसा तया हे च्वंगु दनि। मूर्ति आः कोषया ज्याकुथी तयातःगु दु ।
