संघीय व्यवस्था: विराटय् समर्थन, तःमुँज्याय् विरोध
ख्वप (सन्ध्या टाइम्स)/ पीच्यागूगु विराट नेपालभाषा साहित्य सम्मेलन व नीगुंगूगु साहित्यया तःमुँज्या म्हिगः थनया निगू अलग अलग थासय् शुरु जुल। याछेँय् विराट सम्मेलन व त्रिपुरासुन्दरीइ तःमुँज्या जूगु खः ।
थुगुसी जूगु थ्व निगू सम्मेलनं देशय् लागू जुइत्यंगु संघीय व्यवस्था व उकिया स्वरुप बारे धाःसा पाय्छि विपरित बिचाः बिउगु खने दत। विराट सम्मेलनया वक्तातय्सं मुक्कं हे जातीय स्वशासनया पक्षय् वकालत यासें नेवाः स्वायत्त प्रदेश दयेमाः धकाः माग यातसा तःमुँज्यां संघीय व्यवस्थां देय् कुचा यायेफु धासें जातीय आधारय् प्रदेश निर्माण याये मजिउगु बिचाः बिल ।
विराटय् लक्ष्मण राजवंशी, लोकेन्द्र वज्राचार्य आदि थेंज्याःपिं जातीय स्वशासनया पक्षधर वक्तातय्सं संवोधन याःगु खःसा थौं जातीय स्वशासन हे माः धकाः संघर्ष यानाच्वंपिं मेपिं व्यक्तित्वतय्सं नं न्ववाइ तिनि ।
मेखे साहित्य तःमुँज्याय् धाःसा संघीय व्यवस्थाया हे विरोध यानाच्वंपिं भीमार्जुन आचार्य, रत्नसंसार श्रेष्ठ, बालकृष्ण न्यौपाने थेंज्याःपिं वक्तातय्सं संवोधन यानादीगु खः ।
