काति दबली 'कार्तिक नाच' सफू बिमोचन
यल (सन्ध्या टाइम्स)/अन्तर्राष्ट्रिय जेष्ठ नागरिक दिवसया लसताय् म्हिगः मंगलबजारया काति दबुली जूगु छगू ज्याझ्वःया दथुइ हरिमान श्रेष्ठं च्वयादीगु 'कार्तिक नाच' नांगु सफू नांजाःम्ह साहित्यकार व संस्कृतिविद् सत्यमोहन जोशीं विमोचन यानादिल ।
जेष्ठ नागरिक समाजया अध्यक्ष गोपालमान श्रेष्ठया सभापतित्वय् जूगु ज्याझ्वलय् च्वमि श्रेष्ठयात मूपाहांपाखें हना पौ लःल्हानादिल। समितिया उपाध्यक्ष रामप्रसाद जोशीं लसकुस याना न्ह्याकूगु उगु ज्याझ्वलय् ७८ दँ पुले धुंकूपिं समितिया दुजःपिंत हनेज्या जूगु खः ।
३६४ पृष्ठ दुगु थुगु सफू च्यासः दां मू तयातःगु दु। जेष्ठ नागरिक ललितपुरया प्रकाशन प्रवन्धक समितिं पित बिउगु उगु सफुतिइ काति प्याखंया विवरण न्ह्यथनातःगु दु। लुमंके बहजू दँय्दसं मंगलबजारया काति दबुली क्यना वयाच्वंगु कातिप्याखं थुगुसी वइगु कार्तिक ७ गतेनिसें १४ गते तक काति दबुली क्यनीगु जूगु दु ।
