छवाःया दुने न्यासः तका वंगु नोट
येँ (सन्ध्या टाइम्स)/वइगु छवाःया दुने झिंखुगू अर्ब बराबरया ध्यबा वइगु खँ नेपाल राष्ट्र बैंकं जानकारी बिउगु दु। फ्रान्सया अबरथर नांया कम्पनीइ छापे जूगु न्यासः तका दरया उगु ध्यबा वंगु बाःछि न्ह्यः हे फ्रान्सं छुटे जुइधुंकूगु खँ स्रोतं धाःगु दु ।
बैंकया छम्ह उच्च तहया अधिकतं बिउगु जानकारी कथं समुद्री मार्ग जुयाः वयाच्वंगु उगु ध्यबा मेगु वाः तकया दुने कोलकाताया बन्दरगाहय् थ्यनी ।
फ्रान्सय् छापे जुयाः वयेत्यंगु उगु न्यासः तका वंगु ध्यबाय् तत्कालिन कामु गभर्नर कृष्णबहादुर मानन्धरया ल्हाःचिं दु। समुद्री मार्ग जुयाः वयेत्यंगु उगु ध्यबा फ्रान्सं नेपाः तक वयेत निला ई बीगु खँ स्रोतं धाःगु दु ।
मोहनि नखः न्ह्यः ततःपागु नोटया व्यापक अभाव जुइवं सरकारं दथुं हे उगु नोट हवाईमार्गं हयेगु नं निर्णय याःगु खः। तर सरकारी निर्णय जूगु इलय् तकया दुने उगु नोट मलेशियाया बन्दरगाहं नं छुटे जुइधुंकूगुलिं हवाई मार्ग हयेगु सम्भव मजूगु खः ।
नखःया इलय् तपाःगु नोटया तच्वकं अभाव जुइवं राष्ट्र बैंकं मोहनिया इलय् नं न्हिं निघौ बैंक चायेकाः सामान्य त्रुटि जूगु नोट वितरण यायेत वाणिज्य बैंकतय्त निर्देशन बिउगु खः। राष्ट्र बैंकया उम्ह अधिकृतया कथं नखःया इलय् अज्याःगु नोट जक ग्वीप्यंगू करोडं मल्याक वितरण जूगु खँ धाःगु दु।
वंगु निन्हु दुने जक हिमालयन व स्टाय्ण्डर्ड चार्टर्ड बैंकं जक स्वंगू करोड तका दां यंकूगु नं राष्ट्र बैंकं जानकारी बिउगु दुसा मोहनि न्ह्यः निसें थौंतक गुगुं नं वाणिज्य बैंकं राष्ट्र बैंकय् ध्यबा जम्मा याःगु मदुनि ।
राष्ट्र बैंकं बिउगु मेगु छगू जानकारी कथं वइगु डिसेम्बरया अन्त तकया दुने थप १ खर्ब बराबरया द्वःछि तका वंगु नोट नं थ्यंकः वइगु जूगु दु ।
उगु ध्यबा इण्डोनेशियाया पेरुम पेरोरी कम्पनीइ छापे जुया वयेत्यंगु खः ।
