सहमतिया राजनीतिलय् शीर्ष नेतात एकमत
प्रमुख स्वंगू दलया शीर्ष नेतातय्सं सहमतिया राजनीति मार्फत संविधान निर्माण व शान्तिप्रकृयायात तार्किक निष्कर्षय् थ्यंकेमा:गु खँय् बः ब्यूगु दु ।
विश्व अहिंसा दिवसया लसताय् तक्षशिल एकेडेमीं शुक्रवाः ग्वसाःग्वःगु छगू ज्याझ्वलय् एकीकृत नेकपा (माओवादी)या अध्यक्ष पुष्पकमल दाहाल 'प्रचण्ड', नेपाली कांग्रेसया सभापति गिरिजाप्रसाद कोइराला व नेकपा (एमाले)या अध्यक्ष झलनाथ खनालं छगू हे मञ्चं सहमतिया राजनीतिइ बः बियादीगु खः ।
ज्याझ्वलय् कांग्रेस सभापति कोइरालां माहत्मा गान्धीया अहिंसावादी आन्दोलनया उच्च प्रशंसा यानादिसें नेपाःया शान्ति प्रकृयां विश्वयात अहिंसाया पाठ स्यंगु धयादिल । वयेकलं हत्या हिंसाया राजनीति त्वताः माओवादी शान्तिपूर्ण राजनीतिइ वःगु नं अहिंसाया छगू दसू जूगु बिचाः प्वंकादिल ।
अथेहे ज्याझ्वलय् माओवादी अध्यक्ष प्रचण्डं शान्ति प्रकृयाया सफलताया निंतिं दलत दथुइ सहमति व राष्ट्रसंघ व छिमेकी राष्ट्रतय् निरन्तार ग्वाहालि आवश्यक जूगु धयादिल । वयेकलं देशय् हिंसा अन्त्य मजूतल्ले संविधान निर्माण जुइमफइगु धयादिल ।
स्वक्वःगु अहिंसा दिवसया लसताय् जूगु थुगु ज्याझ्वलय् एमाले अध्यक्ष खनालं देय्या निंतिं दलत न्ह्याःगु कथंया सहमति यायेत नं तयार जूगु धयादिसें दलत मिलेजुया हे न्हूगु संविधान निर्धारित ईलय् निर्माण याइगु धयादिल । अनमिन प्रमुख करिन ल्याण्ग्रेनं प्रमुख स्वंगू दल मिलेजुयावंसाः जक नेपालय् शान्ति व न्हूगु संविधान निर्माण सम्भव जूगु बिचाः प्वंकादिल ।
संयुक्त राष्ट्र संघं सन् २००७ निसें अक्टोबर २यात अन्तर्राष्ट्रिय अहिंसा दिवसया कथं न्यायेका वयाच्वंगु दु ।
