संसदय् संकल्प प्रस्ताव यंकेत स्वंगू प्रमुख दलत सहमत
स्वंगू प्रमुख दलत एकीकृत नेकपा (माओवादी), नेपाली कांग्रेस व नेकपा (एमाले) दथुइ संसदय् संकल्प प्रस्ताव यंकेत सहमत जूगु दु ।
बिहीवाः माओवादीया संसदीय दलया ज्याकू सिंहदरवारय् च्वंगु स्वंगू दलया बैठकय् नागरिक सर्वोच्चता कायम जुइकथं संकल्प प्रस्ताव यंकेगु सहमति जूगु खः । बैठकय् संकल्प प्रस्तावय् राष्ट्रपतिया कार्यक्षेत्रया बारे सहलह याइ कथं सहमति जुसां राष्ट्रपितं ल्ह्वंगु पलाःया बारे छुं खँ न्ह्यमथनीगु बारे सहलह जूगु खः ।
माओवादी उपाध्यक्ष नारायणकाजी श्रेष्ठ 'प्रकाशं' राष्ट्रपतियात पूर्ण सेरेमोनियल दयेकीगुलिं वहे कथं संकल्प प्रस्ताव तयार जुइगु खँ धयादिल । अथेहे कांग्रेसया संसदीय दलया नेता रामचन्द्र पौडेलं एमाले पाखें वःगु न्हूगु प्रस्तावय् सहलह जुयाच्वंगु व शुक्रवाः च्वनीगु बैठकं थुकीया बारे निर्णय याइगु कनादिल । अथेहे एमालेया नेता केशव बडालं न्हापाया कमीकमजोरी हानं मजुइ कथं मंकाः संकल्प प्रस्ताव यंकेगु सहमति जूगु धयादिल ।
अथेहे बिहीवाः स्वंगू दलया बैठक जुयाच्वंगु ईलय् प्रधानमन्त्री माधवकुमार नेपाल कांग्रेस सभापति गिरिजाप्रसाद कोइराला निवास महाराजगंज थ्यंकाः मंकाः संकल्प प्रस्तावया बारे सहलह यानादीगु खः ।
राष्ट्रपति डा. रामवरण यादवं प्रधानसेनापतियात थमौति बीगू पलाखं निगू सत्ता कायम जूगु धकाः माओवादीं संसद अवरोध यायेगु नापं आन्दोलन यानावयाच्वंगु खः ।
