नेपाः-चीन नाकाय् कडा सुरक्षा
येँ (सन्ध्या टाइम्स)/ जःलाखःला देय् चीनय् जनगणतन्त्र पलिस्था जूगु खुइदँय् क्यंगु लसताय् जुइगु ज्याझ्वःयात ध्यानय् तयाः नेपाः व चीन स्वाःगु नाकाय् चीनं कडा सुरक्षा व्यवस्था याःगु दु। नेपाःया सहमतिं हे सुरक्षा व्यवस्था कडा याःगु खँ धाःगु दु। थ्वहे झ्वलय् नेपाः व चीन स्वाःगु व्यापारिक नाकाय् नं कारोबार बन्द याःगु दु । लिसें सीमाय् बिना पासपोर्ट सुयातं चीनपाखे मछ्वःगु खँ नं सीदुगु दु ।
नेपाःया सहमति कयाः उत्तरी क्षेत्रया कोदारी, केरुङ, लामबगर, किमाथाँका, टिंकर लगायतया नाकाय् नियमित स्वयां अप्वः सुरक्षाकर्मी परिचालन याःगु दु ।
थ्वहे झ्वलय् राष्ट्रपति डा. रामवरण यादवं चीनया राष्ट्रपतियात छगू भिंतुना सन्देश बियादीगु दु ।
उखे नेपाः व चीन स्वाःगु सिमानाय् सशस्त्र प्रहरी परिचालन यायेगु बारे अध्ययन यायेत गृहमन्त्री भीम रावल थौं मुस्ताङ वंगु दु ।
नेपाःया नाकापाखे चीन विरोधी गतिविधि जुयाच्वंगुलिं उकियात पनेत नेपालं चीन लिसे स्वाःगु सिमानाय् सशस्त्र प्रहरी परिचालन यायेत्यंगु दु ।
नेपाःया तिब्बती शरणार्थीतय्सं थीथी नाकापाखें ल्हासाय् ल्वाभः यंकेगु ज्या यानाच्वंगु खँ पिहां वयेवं चीनया इनापय् सरकारं फुक्कं नाकाय् सशस्त्र प्रहरी परिचालन यायेत्यंगु खः।
थःगु ६० क्वःगु जन गणतन्त्र दिवसय् चीनं थःके दुगु फुक्क हे आधुनिक ल्वाभः विश्वया न्ह्यःने प्रदर्शन यायेगु तयारी यानाच्वंगु दु। थुकी यदि सांघाईंनं प्रहार यात धाःसा अमेरिकाया लस एन्जेलस ध्वस्त यायेगु क्षमता दुगु क्षेप्यास्त्र नं दुथ्याइगु खँ धाःगु दु ।
