स्वंगू दल सहमतिया सतिक
येँ (सन्ध्या टाइम्स)/राष्ट्रपतिया पलाः बारे माओवादी क्वमिलु जुइगु खँ एमाले अध्यक्ष झलनाथ खनालं धयादीगु दु। थौं सुथय् माओवादी अध्यक्ष प्रचण्डया छेँय् वनाः वय्कःलिसे सहलह यानाःलि पत्रकारत लिसे खँ ल्हायेगु झ्वलय् अध्यक्ष खनालं उगु खँ धयादीगु खः ।
अध्यक्ष खनालं मंकाः संकल्प प्रस्ताव यंकेगु बारे माओवादी लचिलो जूगु व थौं हे स्वंगू दल दथुइ सहमति जुइ फइगु खँ नं कनादिल। एमाले व माओवादी दथुइ मंकाः संकल्प प्रस्ताव यंकेगु सैद्धान्तिक सहमति जुइधुंकूगु दुसा आः उकिया भाषा मिले यायेगु होमवर्क शुरु यायेधुंकूगु दु ।
सूत्रं धाः कथं यदि राष्ट्रपतिया अधिकार स्पष्ट तोके यानाः संविधान संशोधन यात धाःसा माओवादीं स्वीकार याइ। म्हिगः प्रचण्डं राष्ट्रपति नापलायेवं थौं भारतीय राजदूतं एमाले व माओवादीया नेतातय्त नापलानाः खँ ल्हाःगु दु ।
