रौतहटय् गोलीं छम्ह सित छम्ह घाःपाः
येँ (सन्ध्या टाइम्स)/रौतहटय् म्हिगः बहनी गोलीं कयाः छम्ह सीगु दुसा छम्ह घाःपाः जूगु दु ।
मोटरसाइकलय् च्वनाः थःगु छेँय् बलरामपुरपाखे वनाच्वंगु इलय् ल्वाभः सहित वंपिंसं याःगु आक्रमणय् लानाः बलरामपुरया देवशरण महतो सीगु खःसा मोटरसाइकलय् च्वनाः वनाच्वंम्ह जयमंगल राय घाःपाः जूगु खः ।
महतो घटनाय् स्थलय् तुं सीगु खःसा राय धाःसा आक्रमण जुइधुंकाः मोटरसाइकलं तिंन्हुया बिसिउँ वनाच्वंगु इलय् गोली कःगु खः ।
थ्वहे झ्वलय् म्हिगःया उगु हत्याया जिम्मेवारी अखिल तराई मुक्ति मोर्चां काःगु दु ।
मोर्चां थौं सुथय् छगू प्रेस विज्ञप्ति जारी यासें थः कार्यकर्ता सुरेन्द्र कुमार यादवया सुराकी यानाः ज्वंकुली कारवाही स्वरुप महतोयात स्यानागु खँ धाःगु दु ।
घटनाय् संलग्न जूगु द्वपनय् प्रहरी मोर्चाया कार्यकर्ता जीवन महतोया लिसें स्वम्हेसित ज्वनेधुंकूगु दु। ज्वंपिं मेपिं महेश राय यादव व भारतया नागरिक मुन्नाकुमार कुशवाह जूगु खँ प्रहरीं धाःगु दु ।
घाःपाः जूम्ह रायया वासः स्थानीय अस्पतालय् याकातःगु दु। उखे प्रहरी घटनाय् संलग्न मोर्चाया मेपिं कार्यकर्तायात मालेगु ज्या न्ह्याकूगु खँ धाःगु दु ।
