झिंस्वम्ह कैदी बन्दूक ज्वनाः कुइँच
येँ (सन्ध्या टाइम्स)/ कञ्चनपुरया जेलं छक्वलं १३ म्ह कैदी बिसिउँ वंगु घटनां गृह प्रशासनय् तःधंगु हलचल हया बिउगु दु। वंगु चालं कुन्हु जेल दुने व पिने सिन्हः तीगु अलमलय् लानाच्वंगु इलय् लाक्क उमिसं पाः च्वनाच्वंपिं प्रहरीतय्त कब्जाय् कयाः अनं बिसिउँ वंगु खः। फरार कैदीतय्सं सुरक्षागार्डतय् ल्वाभः नापं ज्वना वंगु खँ धाःगु दु ।
बिसिउँ वंपिं कैदीत मध्ये स्वम्हेसित घटना जूगु न्हि कुन्हु हे ज्वंगु खःसा मेम्ह छम्हेसित थौं सुथय् ज्वंगु दु। कञ्चनपुरया ब्रम्हदेव क्षेत्रं प्रकाश चन्द नांयाम्ह कैदीयात ज्वंगु खः।
उखे थ्व कैदी बिसिउँ वंगु प्रकरणय् ल्हाः दु धइगु शंका यासें थौं गृह प्रशासनं खुम्ह सुरक्षाकर्मीयात निलम्बन याःगु दु। निलम्बन जूपिं मध्ये प्रहरी नायब निरीक्षक भीमबहादुर बम, जेलर धनबहादुर चन्द खःसा मेपिं प्रहरी जवानत खः। सरकारपाखें थ्व घटना बारे छानबिन यानाः सत्य तथ्य पित हयेगु लागिं गृह मन्त्रालयया सहसचिव शंकर कोइरालाया संयोजकत्वय् छगू छानबिन समिति नं गठन यायेधुंकूगु दु। समितियात रिपोर्ट बीगु लागिं १५ न्हुया ई बियातःगु दु। समितिया दुजःत थौं कञ्चनपुर वनेत्यंगु दु ।
बिसिउँ वंपिं मेपिं कैदीत मालेगु लागिं प्रहरीं जिल्लाया दक्षिणी लागा नापं गड्डाचौकी, ब्रम्हदेव नापं थीथी लागाय् यानाः निसःत्या प्रहरी परिचालन यानातःगु दु ।
