माओवादीं नं वार्ता पुचः स्वन
येँ (सन्ध्या टाइम्स)/राजनीतिक गतिरोध चीकेगु निंतिं प्रमुख प्रतिपक्षी एकीकृत नेकपा (माओवादीं) न्याम्ह दुजः दुगु वार्ता पुचः गठन याःगु दु। थौं सुथय् माओवादी अध्यक्ष पुष्पकमल दाहाल 'प्रचण्ड'या छेँय् च्वंगु बैठकं थीथी राजनीतिक दलतलिसे वार्ता यायेगु निंतिं पार्टी उपाध्यक्ष डा. बाबुराम भट्टराईया नेतृत्वय् उगु वार्ता पुचः नीस्वंगु खः।
दुजलय् माओवादीया मेम्ह उपाध्यक्ष नारायणकाजी श्रेष्ठ 'प्रकाश' लिसें पोष्टबहादुर बोगटी, देव गुरुङ व नेत्र विक्रम चन्द 'विप्लव' च्वंगु दु ।
थौं सुथय् च्वंगु माओवादी बैठकं थीथी दलत लिसेया सहलहयात तीव्रता बीगु निर्णय नं याःगु दु। थ्व स्वयां न्ह्यः एमालें पोलिटब्युरो दुजः भरतमोहन अधिकारीया नेतृत्वय् वार्ता पुचः नीस्वंगु खःसा उगु पुचलं थीथी राजनीतिक पार्टीतलिसे सहलह ब्याकेगु ज्या यानाच्वंगु दु ।
