मातृका व सशस्त्र पुचःया वार्ता
येँ (सन्ध्या टाइम्स)/नेकपा (माओवादी) पाखे बिस्कं च्वनाः नेकपा (माओवादी) या नामं हे मेगु पार्टी चायेकूम्ह मातृका यादवं तराईया थीथी सशस्त्र पुचःतलिसे खँल्हाबल्हा यानाच्वंगु खँ सीदुगु दु ।
यादवं सशस्त्र पुचःतलिसे कार्यगत एकता यायेगु निंतिं धकाः जयकृष्ण गोइतलिसे स्वकः टेलिफोन वार्ता यायेधुंकूगु दुसा मेमेगु सशस्त्र आन्दोलन यानाच्वंगु पुचःत पृथ्वी समुह, पवन गिरी समुह व रामविलास यादवं नेतृत्व यानाच्वंगु पुचः लिसे नं खँल्हाबल्हा याःगु खँ सीदुगु दु ।
उखे थःगु पार्टीं निगू ट्रक ल्वाभः हल धकाः पिहां वःगु समाचारयात नं मातृका यादवं खण्डन याःगु दु। वय्कलं नेकपा (माओवादीं) सप्तरी ग्वसाः ग्वःगु कार्यकर्ता प्रशिक्षण ज्याझ्वलय् उगु जानकारी बियादीगु खः ।
