सुरक्षास्थिति बारे जानकारी कायेत गृहमन्त्री मुस्ताङय्
येँय् तिब्बती प्रदर्शकारीतय्त ज्वन
चीनया स्वशासित क्षेत्र तिब्बत नाप सिमा स्वाःगु स्थानया स्थलगत भ्रमण यानाः गृहमन्त्री भीम रावलं सुरक्षा स्थिति बारे जानकारी कयादीगु दु ।
वयेकलं बिहीवाः सुथय् हेलीकप्टरय् च्वनाः मुस्ताङया थीथी स्थान थ्यंकाः मुस्ताङ व तिब्बतया सिमा क्षेत्रया सुरक्षा स्थिति बारे जानकारी कयादिल । गृहमन्त्रीं नेतृत्व यानादीगु पुचलं लोमान्थाङ व नापसंया क्षेत्रय् सुरक्षास्थितिया बारे जानकारी कयादीगु खः । सरकारं चीनया इनापय् सिमा क्षेत्रय् चीन विरोधी गतिविधि नियन्त्रण यायेत सशस्त्र प्रहरीया सिमा सुरक्षा बल स्थापना यायेगु तयारी यानाच्वंगु खँ गृहमन्त्री रावलं धयादीगु दु ।
चीनं सिमा क्षेत्रय् जुइफुगु चीन विरोधी गतिविधि नियन्त्रण यायेत सरकारया तःक्व हे इनाप यायेधुंकूगु दु ।
अथेहे चीनय् कम्युनिष्ट साशन न्ह्याःग खुइदँ दुगु लसताय् नेपालय् चीन विरोधी गतिविधि जुइफइगु खँ यात ध्यानय् तयाः प्रहरीं बिहीवाः येँया थीथी थासं छगू दर्जन तिब्बती प्रदर्शकारीतय्त नियन्त्रणय् काःगु दु । प्रहरीं गौशाला, सोर्हखुट्टे, बौद्ध, कमलपोखरी लगायत थीथी थासं स्वतन्त्र तिब्बतया माग यासें चीन विरोधी नारा थ्वयेकाः च्वंगु ईलय् उमित नियन्त्रणय् काःगु खः ।
