राष्ट्रपतिया बारे सहलह याकेबीमखु : सुशील
नेपाली कांग्रेसया कार्यवहाक सभापति सुशील कोइरालां राष्ट्रपति डा. रामवरण यादवया बारे संसदय् छुं नं हालतं सहलह याके मबीगु खँ धयादीगु दु ।
बिहीवाः नेपाल प्रेस युनियन बाँकें ग्वसाःग्वःगु पत्रकार सम्मेलनय् न्ववानादिसें कोइरालां राष्ट्रपतिया बारे संसदय् सहलह नं कायेमबीगु व संविधान संशोधन नं याकेमबीगु खँ धयादिल । एकीकृत नेकपा (माओवादी) व नेकपा (एमाले) दथुइ राजनीतिक गतिरोध ज्यंकेत संविधान संशोधन यायेत तयार जूगु ईलय् कांग्रेस कार्यवहाक सभापतिया थंज्यागू धापू वःगु खः ।
पत्रकार सम्मेलनय् वयेकलं माओवादीया नेतृत्वय् न्हूगु सरकार गठन जुइमफइगु दाबी यानादिसें थःगु नेतृत्वय् सरकार गठन जुइ धकाः हल्ला यायेवं धाथें सरकारया नेतृत्व यायेगु ह्वताः मदइगु धयादिल । वयेकलं सरकारया नेतृत्व यायेगु खसाः संसदय् बहुमत क्यनेत माओवादीयात हाथ्या नं बियादिल ।
कोइरालां माओवादीं थ्व सरकारय् ब्वति कायेगु खसाः थः पिनिगु जंगली प्रवृती त्याग यायेमाःगु खँ धयादिल । वयेकलं वर्तमान सरकारयात नेपाली कांग्रेसंया पूर्ण समर्थन दुगु नं धयादिल ।
अथेहे कोइरालां राजनीतिक गतिरोध ज्यंकेत जुयाच्वंगु वार्ता सकारात्मक जूगु धयादिसें माओवादीं शान्ति सम्झौताया पूर्ण पालना यासाः जक न्हूगु सहमति जुइफइगु धयादिल ।
