प्रचण्ड व खनाल दथुइ खँल्हाबंला
राष्ट्रपति व माओवादी अध्यक्ष दथुइ नं खँल्हाबंला
राजनीतिक गतिरोध ज्यंकेगु निंतिं राजनीतिक दलत दथुइ तीव्र जयाच्वंगु कुतः स्वरुप निगू तःधंगू वामपन्थी दलया शीर्ष नेतात दथुइ राजनीतिक गतिरोध ज्यंकेगु बारे खँल्हाबंला जूगु दु ।
सत्ता नेतृत्व यानाच्वंगु नेकपा (एमाले)या अध्यक्ष झलनाथ खनाल व प्रमुख प्रतिपक्षी दल एकीकृत नेकपा (माओवादी)या अध्यक्ष पुष्पकमल दाहाल प्रचण्ड दथुइ बिहीवाः सुथय् गतिरोध ज्यंकेगु उपायया बारे सहलह जूगु खः ।
निम्ह नेतातय् दथुइ खँल्हाबंला लिपाः संचारकर्मीत नाप खँल्हाबंला यानादिसें एमाले अध्यक्ष खनालं समस्या ज्यंकेत माओवादी अध्यक्ष गम्भीर जूगु व समस्या समाधान यायेत माओवादीं लचकता क्यनेत तयार जूगु धयादिल । वयेकलं समस्या गुकथं ज्यंकेगु धइगु बारे बिहीवाः न्हिनय् जुइगु स्वंगू दलया शीर्ष नेतातय् बैठकय् सहलह जुइगु कनादिल ।
बिहीवाः सत्तारुढ एमाले, नेपाली कांग्रेस व प्रमुख प्रतिपक्षी दल माओवादीया शीर्ष नेतात दथुइ खँल्हाबंला जुइगु जूगु दु ।
अथेहे माओवादी अध्यक्षयात नापलायेत भारतीय राजदूत राकेश सुद बिहीवा: हे प्रचण्ड निवास न्हूबजार थ्यंकादीगु खः । प्रचण्ड नापया खँल्हाबंलाय् भारतीय राजदूत सुदं वर्तमान राजनीतिक अवस्थाया बारे च्यूताः प्वंकूगु खः ।
थ्वहे दथुइ बुधवाः सनिलय् एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' राष्ट्रपति डा. रामवरण यादव नाप सहलह यानादीगु दु ।
राष्ट्रपतिया छेँ शितल निवासय् जूगु खँल्हाबंलाय् माओवादी सरकार पतन जूगुया कारण लिसें वर्तमान राजनीतिक गतिरोध ज्यंकेगु बारे सहलह जूगु खः । राष्ट्रपति यादवं प्रधानसेनापतिया थमौति बीत ल्ह्वंगू पलाः लिपाः माओवादीया नेतातय्सं राष्ट्रपतियात नापलाःगु थ्व न्हापांगु पटक खः ।
राष्ट्रपति यादव नाप खँल्हाबंला लिपा माओवादी अध्यक्ष प्रचण्डं संचारकर्मीत नाप खँल्हाबंला यानादिसें राष्ट्रपति नाप खँल्हाबंला जुइवं राजनीतिक गतिरोध अन्त्य जुइगु मखुसां समस्या ज्यंकेगु निंतिं थ्व बालांगु शुरुवात जूगु धयादिल । वयेकलं गतिरोधया बारे राष्ट्रपति गम्भीर खनेदुगु व राष्ट्रपतिं थुकीं यानाः संविधान च्वयेगु ज्याय् लिच्वः लाकीगु खँ धयादीगु बारे पत्रकारतय्त जानकारी बियादिल ।
