कुमारी माजुया कक्षा शुरु
येँया कुमारीछेँय् वंगु मोहनिबलय् तिनि पलिस्था याःम्ह न्हूम्ह कुमारी माजु मतिना शाक्ययात थिनंनिसें आखः ब्वंकेगु शुरु याःगु दु । वसपोल येँया हे कय्ताहितिइ च्वंगु ओपन हाउस सेकेण्डरी इंग्लिस स्कूलय् नस्ररी तगिमय् ब्वनीम्ह खः । आः कुमारी जुइधुंकाः वसपोलया ब्वनेगु व्यवस्था नं वहे स्कूलं याःगु खः । वसपोलयात आः उगु हे स्कूलयाम्ह शिक्षिका मय्जु सानु महर्जनं न्हिंन्हिं कुमारीछेँय् वयाः ब्वंकादी । वंगु शुक्रवाः शिक्षिका सानु व स्कूलया प्रिन्सिपल बुद्धरत्नपिं कुमारीछेँय् वयाः कुमारीया दर्शन यासें ब्वनेगु ज्याया तयारी याना थकूगु खः ।
आःयात वसपोलयात नस्ररी कक्षाय् ब्वनीगु अंग्रेजी गणित विज्ञान आदि विषयत ब्वंकीसा लिपा उमेर कथं कम्प्युटर शिक्षा नं बीगु खँ दु । कुमारी पदं लिहां वयेधुंकाः वसपोलयात हानं थ्वहे स्कूलय् तुं ब्वंकीगु खँ नं धाःगु दु । वसपोलं ब्वनेमाःगु स्कूलया सफूत म्हीग हे छ्वया हयेधुंकूगु दु ।
कुमारीछेँपाखें सीदु कथं कुमारी माजुयात न्हिंन्हिं १२ निसें ४ बजे तक ब्वंकेगु ज्या जुइ । उगु इलय् वसपोलया दर्शन पुजाआजाया छुं हे ज्या जुइ मखु । आःयात वसपोलयात छम्ह जक शिक्षकं ब्वंकीसा लिपा तिगं थहां वंलिसे शिक्षकत नं थपे जुइ ।
निवर्तमान कुमारी मय्जु प्रीति शाक्य थौंकन्हय् ह्वाइटफिल्ड स्कूलय् न्यागू तगिमय् भर्ना जुयादीगु दु । वसपोल कुमारी जुयाच्वंगु इलय् थ्वहे स्कूलं ब्वंकेगु व्यवस्था याःगु खः । कुमारी जुईपं मस्तय्त न्हापा न्हापा आखः ब्वंकेगु चलन मदुसां मय्जु रश्मी शाक्यया पालंनिसें कुमारीछेँय् तुं शिक्षकया व्यवस्था यानाः ब्वंकेगु शुरु याःगु खः ।
