चर्च दुना नीस्वम्ह सीत
धरानया भिक्टोरिया चोकय् लाःगु चर्च दुना प्याम्ह मस्त नापं नीस्वम्ह सीगु दु ।
मंगलवाः बहनी झिंछतात्या ईलय् सियोन चर्चय् ग्वसाःग्वःगु अन्तर्राष्ट्रिय पवित्र सम्मेलनया निंतिं दयेकातःगु पँया अस्थायी टहरा दुना उगु दुर्घटना जूगु खः । दुर्घटनाय् खुइप्यम्ह गम्भीर घाःपाः जूगु दु । घाःपाः जूपिंत बीपी कोइराला स्वास्थ्य विज्ञान प्रतिष्ठानया आकस्मिक कक्षय् वासः याकात:गु खँ प्रहरीं धाःगु दु ।
चर्चय् ग्वसाःग्वःगु सम्मेलनय् नेपाः व भारतया यानाः निद्व स्वयां अप्वः भक्तजनतय्सं ब्वति काःगु खः । असोज १२ गते निसें न्ह्याःगु सम्मेलनय् ब्वति कयाः टहराय् झिंन्यासलं मल्याक्क मनूत च्वनाच्वंगु खः । दुर्घटना लिपाः स्थानीय बासिन्दा व प्रहरीं उद्धार याःगु खः ।
उगु दुर्घटनाय् लाना सिपिं प्रति प्रधानमन्त्री माधवकुमार नेपालं श्रद्धाञ्जली प्वंकूगु दुसाः घाःपाः जूपिनि शीघ्र स्वास्थ्यलाभया कामना याःगु दु ।
