'संविधान निर्माणयात केन्द्रय् तया जक सहमति जुइफइ'
नेकपा (एमाले)या अध्यक्ष झलनाथ खनालं संविधान निर्माणयात केन्द्र तया जक सहमति जुइफइगु खँ धयादीगु दु ।
काजीकस्थानया भ्रमण क्वचायेकाः मंगलवाः येँय् थ्यंकादिम्ह अध्यक्ष खनालं त्रिभुवन अन्तराष्ट्रिय विमानस्थलय् पत्रकारत नाप खँल्हाबंला यानादिसें राजनीतिक सहमतिया ठोस विषय तय जुइधुंकाः तिनी विश्वासया वातावरण निर्माण जुइगु धयादिल । वयेकलं सहमतिया निंतिं एमालें न्ह्यने सारे याःगु मंकाः संकल्प प्रस्तव उपयुक्त जुइगु नं बिचाः प्वंकादिल । वयेकलं आःया ई तीव्र प्रतिस्पर्धाया मखसें सहमतिया लँपू पाखें न्ह्याः वनीगु खः धयादिल ।
थ्वस्वयां न्ह्यः एकीकृत नेकपा (माओवादी)या अध्यक्ष पुष्पकमल दाहाल 'प्रचण्ड' व नेपाली कांग्रेसया सभापति गिरिजाप्रसाद कोइराला दथुइ जूगु खँल्हाबंलाय् एमाले अध्यक्ष खनाल येँय् लिहांवयेवं शीर्ष नेतातय् बैठक च्वनाः निकास मालेगु सहमति जूगु खः ।
