कोइराला व प्रचण्ड दथुइ सहलह
वर्तमान राजनीतिक गतिरोध ज्यंकेगु बारे नेपाली कांग्रेसया सभापति गिरिजाप्रसाद कोइराला व एकीकृत नेकपा (माओवादी)या अध्यक्ष पुष्पकमल दाहाल 'प्रचण्ड' दथुइ खँल्हाबंला जूगु दु ।
आइतवाः कांग्रेस सभापति कोइराला विराटनगरं येँय् लिहांवयेधुंकाः जूगु खँल्हाबंलाय् सहमतिया हे लँपू पाखें समस्या ज्यंकेगु सहमति जूगु दु । निम्ह पुलापिं प्रधानमन्त्रीत दथुइ सत्ता नेतृत्व यानाच्वंगु दल नेकपा (एमाले)या अध्यक्ष झलनाथ खनाल नेपाः लिहां वयेवं स्वंगू प्रमुख दलया शीर्ष नेतात दथुइ सहलह यायेगु सहमति जूगु दु ।
खँल्हाबंला लिपा संचारकर्मीत नाप खँल्हानादिसें माओवादी अध्यक्ष प्रचण्डं एमाले अध्यक्ष खनाल येँ लिहांवयेवं उच्चस्तरीय खँल्हाबंला जुइगु कनादिल । वयेकलं शान्ति प्रकृयायात तार्किक निष्कर्षय् थ्यंकेगु व निर्धारित ईलय् संविधान च्वयेगु बारे खँल्हाबंलाय् सहमति जुइगु धयादिल ।
थ्वस्वयां न्ह्यः कांग्रेस सभापित कोइराला येँ लिहांझाये न्ह्यः विराटनगरय् पत्रकारत नाप खँल्हाबंला यानादिसें दलत दथुइ याकनं हे सहमति जुइगु खँ धयादीगु खः । वयेकलं थौं हे येँ लिहांवनाः माओवादी अध्यक्ष प्रचण्ड नाप खँल्हाबंला यायेगु खँ नं उगु ईलय् धयादीगु खः ।
