संविधानसभा विघटन यायेगु षडयन्त्र जुयाच्वंगु दु : प्रकाश
एकीकृत नेकपा (माओवादी)या उपाध्यक्ष नारायणकाजी श्रेष्ठ 'प्रकाशं' संविधानसभा विघटन यायेगु षडयन्त्र जुयाच्वंगु खँ धयादीगु दु ।
चितवनय् छगू आन्तरिक ज्याझ्वलय् ब्वति कायेत माडी थ्यंकादिम्ह प्रकाशं संचारकर्मीत नाप खँल्हाबंला यानादिसें संविधानसभा विघटन यायेगु षडयन्त्रय् विदेशी शत्तित नाप दलत नं लगेजुयाच्वंगु द्वपं बियादीगु दु ।
वयेकलं माओवादीं न्हापा संविधानसभा विघटन यायेगु षडयन्त्र असफल याइगु व लिपा राजनीतिक अन्यौल चीकेगु ज्याय् लगे जुइगु धयादिल । वयेकलं दलत नागरिक सर्वोच्चताया विषययात सम्बोधन यायेत सहमत मजूसाः उकीया लिच्वः बामलाइगु ख्याच्वः नं बियादिल ।
माओवादीं संसदय् दर्ता याःगु संकल्प प्रस्तावय् सहलह जूगु जुसाः संसद अवरोध यायेमाःगु अवस्था मदुगु धयादिसें वयेकलं मेमेगू दलं साथ मब्यूगुलिं बाध्य जुयाः संसद अवरोध यायेमाःगु धयादिल । माओवादीया मू आन्दोलन नागरिक सर्वोच्चता हे जूगु धयादिसें राष्ट्रपतिया कार्यक्षेत्र संवैधानिक वा सेरेमोनियल छु खः धइगु विषयलय् संविधानय् स्पष्ट जुइगु कथं संविधान संशोधन यासाः माओवादी संसदय् बाधक मजुइगु धयादिल ।
