'चालु शान्ति प्रकृयायात सकारात्मक निष्कर्षय् थ्यंकेत सरकार कटिवद्ध'

प्रधानमन्त्री माधवकुमार नेपालं संविधानसभा मार्फत लोकतन्त्रयात जनता तक थ्यंकेगु व राजनीतिक दलत दथुइया बिचाः बिमर्श व परामर्शं चालु शान्ति प्रकृयायात सकारात्मक निष्कर्षय् थ्यंकेत सरकार कटिवद्ध जूगु खँ धयादीगु दु ।

प्रधानमन्त्री नेपालं संयुक्त राष्ट्र संघया ६४ क्वःगु महासभाययात शानिवाः बहनी सम्बोधन यानादिसें नेपाः तःधंगु राजनीतिक संक्रमण पाखें न्ह्यावनाच्वंगु धयादिसें संविधान सभा मार्फत न्हूगु लोकतन्त्र व गणतान्त्रिक संविधान च्वयेगु ज्याय् लगेजुयाच्वंगु जानकारी बियादिल । वयेकलं संविधानसभा नेपाःया इतिहासय् दकलय् समावेशी व प्रतिनिधिमुलक निर्वाचित संस्था मध्ये छगू जूगु धयादिल ।

वयेकलं थःम्ह नेतृत्व यानाःगु सरकारया प्यंगू मू ज्या दुगु धयादिसें उगु ज्यात - शान्ति प्रकृयायात सकारात्मक निष्कर्षय् थ्यंकेगु, निर्धारित ईया दुने संविधानसभा मार्फत न्हूगु लोकतान्त्रिक संविधान निर्माण यायेगु, जनतायात गरीवीया रेखां च्वये थकाया देशय् आर्थिक विकासया अभिबृद्धि यायेगु व न्हूगु लोकतान्त्रिक परिवेश अन्तर्गत जनताया अप्वयाच्वंगु आकांक्षायात सम्वोधन व व्यवस्थापन यायेगु धयादिल । थुपिं दक्वं ज्या पूवंकेत दलत दथुइ सम्वाद, परामर्श व सहमति याना: हे न्ह्यावनेगु खँ नं वयेकलं धयादिल ।

विकास व स्वतन्त्रता निगूलिं देय्या आवश्यकत जूगु धयादिसें प्रधानमन्त्री नेपालं सरकार निगूलिं समान लक्ष्य प्राप्तिया निंतिं स्पष्ट दूरदर्शिता व प्रतिवद्धताया साथ पूवंकेत प्रतिवद्ध जूगु धयादिल । वयेकलं थुकी अन्तर्राष्ट्रिय समुदाययात ग्वाहालि व समर्थन प्राप्त जुइच्वनीगु खँय् थः विश्वस्त दुगु बिचा: प्वंकादिल ।

प्रधानमन्त्रीं मानवअधिकार संरक्षण व सम्वद्रधन यायेगुलि सरकार पूर्ण प्रतिबद्ध जूगु धयादिसें संक्रमणकालीन न्याय सुनिश्चित यायेत व सामाजिक मेलमिलाप व शान्ति स्थापना यायेगु निंतिं सत्य व मेलपिलाप आयोग व वेपत्ता सम्बन्धी आयोग गठन यायेत सरकार कटिवद्ध जूगु धयादिल ।

महासभाया बैठकय् झिंछम्हम्ह वक्ताया कथं सम्बोधन यानादिसें वयेकलं नेपालय् अनमिन मार्फत संयुक्त राष्ट्र संघं शान्ति प्रकृयाय् बियाच्वंगु निरन्तर ग्वाहालिया सरहाना यानादिल ।

अथेहे नेपाः छगू तरुण हिमाल व कमजोर पर्यावरण प्रणलीयुक्त दे जूगु व जलवायु परिवर्तनया अत्यन्त कठोर संकेतया रुपं खनेदुगु विश्वव्यापी संकेत नेपालय् नं खनेदुगु जानकारी प्रधानमन्त्री नेपालं यानादिल । वयेकलं नेपाः थंज्याःगु अल्पविकसित व अन्य विकसित मुलुकया नाजुकता व कमजोरीयात विशेष ध्यानय् तयाः मंकाः व फरक उत्तरदायित्वया सिद्धान्तया नालाकयाः कोपनहेगन सम्मेलनं सन् २०१२ लिपा जलवायु परिवर्तनया समस्यायात सम्बोधन यायेगु निंतिं न्हूगु सम्झौता तय यायेमाःगु खँय् बः बियादिल ।

वयेकलं दक्वं कथंया आतंकवादया कडारुपं भर्त्सना यानादिसें आतंकवाद विरुद्धया विस्तृत महासन्धि शीघ्ररुपं सम्पन्न यायेत नं आव्हान यानादिल । वयेकलं आतंकवाद विरुद्धया विश्वव्यापी प्रस्तावत पाखें अन्तर्राष्ट्रिय आतंकवाद विरुद्ध ल्वायेगु प्रतिवद्धता नं प्वंकादिल ।