प्रधानमन्त्रीयात अमेरिकाय् हाकूगु ध्वाँय्
प्रधानमन्त्री माधवकुमार नेपालं संयुक्त राष्ट्र संघया ६४ क्वःगु महासभायात सम्बोधन यानाच्वंगु ईलय् राष्ट्रसंघया भवन पिने विद्यार्थीतय्सं हाकूगु ध्वाँय् क्यनाः प्रदर्शन याःगु दु ।
अमेरिकी ई कथं न्हिनयसिया झिंनिताः ई निसें स्वताः ई तक यू. एन. प्लाजाया सतक नं पूर्व ४७, पथ १ व २ दथुइ च्वनाः प्रदर्शन याःगु खः । प्रदर्शनकारीतय्सं संविधान ईलय् निर्माण जुइमाःगु, भारतीय हस्तक्षेप बन्द यायेमाःगु, विधिया शासन, समावेशी संविधान निर्माण, जनजाति, मधेशी, दलित आदि समुदायतय् माग सम्बोधन यायेमाःगु आदि नारा च्वयातःगु प्लेकार्ड ज्वनाः प्रदर्शन याःगु खः ।
अथेहे ग्वसाः खलःया इनाप कथं प्रदर्शनकारीतय्सं हाकूगु टि-सर्ट व हाकूगु ध्वाँय् ज्वनाः प्रदर्शन याःगु खः । स्थानीय प्रशासनया अनुमति कयाः प्रदर्शन याःगुलिं प्रहरीं प्रदर्शनकारीतय् हस्तक्षेप मयाः ।
स्वतन्त्र विद्यार्थी पुचया नांमय् ग्वसाःग्वःगु उगु ज्याझ्वलय् प्रगतिशीन नेपाली फोरम अमेरिका व एलायन्स फर डेमोक्रेसी थंज्याःगु संस्थां नं समर्थन व ऐक्यवद्धा प्वंकूगु खः ।
