कांग्रेस व एमाले छप्पं जुया न्ह्याः वनीगु
सत्ता साझेदार प्रमुख निगू दल नेपाली कांग्रेस व नेकपा (एमाले)दथुइ वर्तमान राजनीतिक गतिरोध, संसद सुचारु यायेगु, न्हूगु संविधान निर्माण आदिया विषयलय् छप्पं जुयावनीगु सहमति जूगु दु ।
राजनीतिक गतिरोध ज्यंकेत शनिवाः कांग्रेस व एमालेया नेतात दथुइ जूगु खँल्हाबंलाय् थुगु सहमति जूगु खः । अथेहे निगू दलं एकीकृत नेकपा (माओवादी)यात गतिरोध ज्यंकेत लचकता क्यनेत नं इनाप याःगु दु । कांग्रेस व एमालें थुगु सरकारं मंकाः नीति व ज्याझ्वः नं न्ह्यब्वयेधुंकूगु खँ धासें माओवादीं यानाच्वंगु आन्दोलनं थुकीया कार्यान्वयनय् असर लाकीगु जूगुलिं माओवादीयात छगू पलाः ल्यूने सरे जुइत इनाप याःगु दु ।
खँल्हाबंलाय् कांग्रेसया पाखे संसदीय दलया नेता रामचन्द्र पौडेल, नेता प्रकासमान सिंह व एमाले पाखें नेता भरतमोहन अधिकारी, प्रदिप ज्ञवाली, केशव बडाल लगायत नेतातय् ब्वति दुगु खः ।
