राष्ट्रपतिया बारे संसदय् सहलह जुइ मफइगु : प्रधानमन्त्री
प्रधानमन्त्री माधवकुमार नेपलं राष्ट्रपति डा. रामवरण यादवया बारे संसदय् सहलह जुइमफइगु खँ धयादीगु दु । वयेकलं राष्ट्रपति विरुद्ध संविधानय् मदु कथं एकीकृत नेकपा (माओवादीं) संसदय् संकल्प प्रस्ताव दर्ता याःगु धयादिसें फुसाः राष्ट्रपति विरुद्ध संसदय् महाअभियोग ह्येत हाथ्या वियादिल ।
अमेरिकाय् च्वंपिं नेपालीतय्सं चायेकूगु नेपाल आदिवासी जनजाति महासंघं शनिवाः याःगु ज्याझ्वलय् न्ववानादिसें प्रधानमन्त्री नेपालं अन्तरिम संविधानं बन्देज याःगु विषयलय् राष्ट्रपतियात विवादय् हःगु धासें माओवादीया आलोचना नं यानादिल । वयेकलं माओवादीं राष्ट्रपति विरुद्ध संकल्प प्रस्ताव दर्ता यानाः संवैधानिक प्रावधान विपरित ज्यायेत स्वःगु धयादिल ।
प्रधानमन्त्री नेपालं शान्ति प्रकृयायात निष्कर्षय् थ्यंकेगु व संविधान ईलय् हे निर्माण यायेगु ज्या सरकारया प्रमुख दायित्व जूगु व थुकी सुं नाप नं सम्झौता मयायेगु धयादिल । वयेकलं न्हापा स्वलाःया दुने हे संविधान निर्माण जूगु दसू न्ह्यब्वयादिसें ईलय् हे संविधान निर्माण जुइगु व थुकीया निंतिं मंकाः सहमति यानाः वनीगु बिचाः प्वंकादिल ।
उगु ज्याझ्वलय् प्रधानमन्त्रीं न्ववाये धुनेवं प्रधानमन्त्री व परराष्ट्र मन्त्री सुजाता कोइरालाया विरुद्ध व्यापक हुटिङ व नाराबाजी जूगु खः । उगु ज्याझ्वलय् प्रधानमन्त्री ज्याझ्वःया निर्धारित ई स्वयां घौच्छि लिब्बाक्क वःगु व अन्तक्रियात्क ज्याझ्वः जुसां सहभागितय्सं प्रधानमन्त्रीयात न्ह्यसः न्यनेमखनेवं सहभागितय्सं नाराबाजी याःगु खः ।
