सहमतिया निंतिं राजनीतिक पहल तीव्र
मोहनि दुने हे वर्तमान गतिरोध अन्त्य यायेगु निंतिं राजनीतिक पहल तीव्र जूगु दु । थ्वहे दथुइ शुक्रवाः नेकपा (एमालें) नेपाली कांग्रेस व एकीकृत नेकपा (माओवादी) नाप बिस्क बिस्कं सहलह याःगु दुसाः माओवादीं नं कांग्रेस नाप बिस्कं हे सहलह याःगु दु ।
एमाले पाखें गठित उच्चस्तरीय वार्ता पुचलं शुक्रवाः माओवादीया उच्च नेतात नाप याःगु सहलहलय् वर्तमान राजनीतिक गतिरोध अन्त्यया निंतिं दक्वसित मान्य जुइगु मंकाः प्रस्ताव ह्येत निगूलिं दलया नेतात सहमत जूगु दु । निगू दलया सहलह पाखें गतिरोध समाधानया निंतिं मध्यमार्ग ल्ययेगु निष्कर्ष पिकाःगु दु । सहलहलय् दक्वं दलयात मान्य जुइ कथं संसदय् संकल्प प्रस्ताव ह्येगु सहमति नं जूगु दु ।
एमालेया मू ज्याकू बल्खुइ जूगु सहलहलय् एमालेया पाखें भरतमोहन अधिकारी, युवराज ज्ञवाली, केशव बडाल व माओवादीया पाखें उपाध्यक्ष नारायणकाजी क्षेष्ठ 'प्रकाश' व कृष्णबहादुर महराया ब्वति दुगु खः ।
अथेहे माओवादी नापया सहलह लिपाः न्हिनय् नेपाली कांग्रेस संसदीय दलया नेता रामचन्द्र पौडेलया छेँय् थ्यंकूगु एमालेया नेतात दथुइ नं राजनीतिक गतिरोध याकनं हे अन्त्य यायेगु बारे सकारात्मक खँल्हाबंला जूगु दु । खँल्हाबंलाय् निगू दल दथुइ थुकीया बारे सत्ता साझेदार नीनिगू दलया मंकाः बैठक च्वनाः निर्णय यायेगु सहमति जूगु दु ।
अथेहे नेपाली कांग्रेसया नेतात नाप माओवादीया नेतातय्सं नं सहलह याःगु दु । सहलहलय् सहमति मार्फत हे याकनं राजनीतिक गतिरोध अन्त्य यायेगु सहमति जूगु दु । सहलह लिपाः कांग्रेस नेता पौडेलं बैठक अत्यन्त सकारात्म जूगु व छुं छुं बिषयलय् अझ सहलह जुइ ल्यं दनीगु व उकी नं याकनं हे सहलह जुइगु कनादिल ।
