माओवादीं राष्ट्रपति विरुद्ध हाकूगु बेलुन ब्वयेकल
फूलपातिया लसताय् नेपाली सेनां सैनिक मञ्चय् ग्वसाःग्वःगु बडाइँ ज्याझ्वलय् राष्ट्रपति डा. रामवरण यादव विरुद्ध एकीकृत नेकपा (माओवादी)या कार्यकर्तातय्सं हाकूगु बेलुन ब्वयेकूगु दु । हाकूगु बेलुन ब्वयेकूपिंत लिपा प्रहरीं नियन्त्रणय् काःगु खः । बडाइँ ज्याझ्वः स्वयेत सर्वसाधारणया भीड जूगुलिं सुरक्षाकर्मीतय्त माओवादीयात पनेत थाकूगु खः ।
पूलपातिया लसताय् जूगु ज्याझ्वलय् राष्ट्रपति यादव, कार्यवहाक प्रधानमन्त्री विजयकुमार गच्छदार, सभामुख सुवाष नेम्वाङ, प्रधानन्यायाधीश, मन्त्रीत, संवैधानिक अंगया प्रमुख, कुटनीटिक नियोगया पदाधिकारीतय् उपस्थिति दुगु खः । अथेहे बडाइँ स्वयेत तःधंगु ल्याखय् सर्वसाधारणत नं सैनिक मञ्च पिने उपस्थिति जुगु खः ।
ज्याझ्वलय् राष्ट्रपतियात प्रधानसेनापति छत्रमानसिंह गुरुङं लसकुस यानादीगु खसाः नेपाली सेनां सलामी ब्यूगु खः ।
