माओवादी दुनेया सैद्धान्तिक संकट

सत्तारुढ पार्टी नेकपा माओवादी दुने सैद्धान्तिक संकट शुरु जूगु दु । शायद थ्व स्वाभाविक नं खः । झिदँ तक जंगलय् च्वनाः जनयुद्ध याना वःगु व बन्दूकया बलं हे सत्ता ल्हातय् लाके फइ धइगु शास्त्रीय बिचाः ज्वनाः न्ह्याना वःगु पार्टी थौं खुल्ला राजनीतिइ वःगु जक मखु थ्वहे खुल्ला राजनीतिया लिधंसाय् सत्तारुढ समेत जुयाच्वंगु अवस्थाय् वया दुने थुकथंया सैद्धान्तिक संकट अस्वाभाविक थ्यंक मखु । पार्टीया छगू पुचः आःया संविधानय् हे जन- गणतन्त्रया लाइन दुथ्याकेमाः धइगु पक्षय् दुसा मेगु पुचः विश्वय् वयाच्वंगु हिउपाःयात कदर यासें पार्टीया नां समेत ँमाओवादी’ धकाः तयाच्वनेम्वाः धइगु पक्षय् दु । थुकथं स्वयेबलय् पार्टी थौं निगू तःधंगु अितया लँपु जुयाः न्ह्यःने वनाच्वंगु दु । यदि थ्व अित ल्यना हे च्वन धाःसा पार्टी न्ह्यःने वने मफइगु खतरा नं उतिकं दु । विगतय् पार्टीं न्ह्यागु हे नीति ज्वंगु खःसां थौंया विश्वय् वयाच्वंगु हिउपाःयात आत्मसात यायेमाःगु आवश्यकता नं थःगु थासय् दु । नापं म्हिगः छगू नारा बियाः जनतायात आन्दोलित यायेधुंकाः आः सत्ताय् थ्यनेसातकि व नारायात परित्याग यानाः जनतायात झंगः लाये मजिउगु वास्तविकता नं थःगु थासय् दु । थौं थ्व निगू विकल्पय् छगू ल्यये मफुगु माओवादीया संकट खः । तर संकट न्ह्यागु कथं वःगु खःसां पार्टीं उकिया निराकरण धाःसा याकनं यायेमाः । मखुसा ज्या यायेगु इलय् आन्तरिक द्वन्द्वं पार्टीयात कमजोर यानाः जनताय् हानं निराशा ब्वलंका बी ।

More Stories Like this