लायन्स क्लब बालाजुया २६ क्वःगु बुदिं हन
येँ (सन्ध्या टाइम्स)/लायन्स क्लब अफ बालाजुया २६ क्वःगु बुदिं थीथी ज्याझ्वः यासें हन। बृद्धावस्था व्यवस्थापन तथा सामाजिक कल्याण गुथिया संचालक व वरिष्ठ समाजसेवी दिलशोभा श्रेष्ठजुया मू पाहांसुइ उगु ज्याझ्वः जूगु खः। लायन्स वर्ष २००८/९ या अध्यक्ष लायन मणिश्रीरत्न वज्राचार्यं लसकुस यानादीगु ज्याझ्वलय् अन्तर्राष्ट्रियपाखें क्लबया संस्थापक अध्यक्ष पुलांम्ह गभर्नर लायन गौतममान श्रेष्ठ, लायन बल्लभबहादुर प्रधानांग, लायन हिमालयप्रसाद शर्मा, लायन अजयरत्न स्थापित, लायन राजेन्द्रनाथ अधिकारीयात हनापौ देछाःगु खः ।
ज्याझ्वःया निगूगु चरणय् लायन्स, लियो व न्हूपिं दुजःपिंत शपथ ग्रहण व लायन २००९/१० या औपचारिक घोषणा यानादिल। मूपाहां दिलशोभा श्रेष्ठं न्हापा छम्ह ज्याथम्हेसित थःगु छेँय् हयाः स्याहार यानागु व आः वया थःगु छेँय् ३२ म्ह अज्याःपिं असहाय ज्याथजिथिपिं दुगु खँ कनादिल। ज्याझ्वः क्वचायेकेत ज्याझ्वः ताःलाकेत ग्वाहालि याःपिंत अध्यक्ष सुरेन्द्ररत्न शाक्यं लुमन्तिया चिं लःल्हानादिल ।
