कारोबारया अन्तय् नेप्से थहां वन
येँ (सन्ध्या टाइम्स)/नेप्से थहां कुहां जुइगु क्रमय् वाःया लिपांगु न्हिं तसकं सामान्य अंकं जक थहां वंगु दु। मोहनिया कारणं नेप्सेय् कारोबारबन्द जुइ छन्हु न्ह्यः कारोबार शुरु जुइवं १ अंक स्वयां च्वय् थहां वंगु खः। वयां घौछि ति लिपा कुहां वयेगु क्रमय् ४ अंक तक कुहां वयेधुंकूगु नेप्से अन्ततः कारोबार बन्द जुइगु इलय् तक थ्यंबलय् शून्य दशमलव १ अंकं थहां वनाः ६३० दशमलव ५५ अंकय् थ्यन। नेप्सेया लिसें कारोबार जूगु मेमेगु सेन्सेटिभ शून्य दशमलव १८ अंक थहां वंगु दुसा फ्लोट नं शून्य दशमलव शून्य २ अंकं थहां वंगु दु ।
कारोबार जूगु मध्ये अप्वः थें बैंकया शेयर भाः कुहां वंसां स्टायण्डर्ड चार्टर्डया शेयरय् १०४/- व नेपाल एसबीआईया ५०/- तका थहां वनेवं वाणिज्य बैंक समुहया उपसूचक शून्य दशलमव ४५ अंकं थहां वनाः ६३१ दशमलव २१ अंकय् थ्यंगु दु। छुं छुं बैंक त्वःताः अप्वः थें बैंकया शेयर भाः कुहां वयेवं नेप्से नं कुहां वंगु खः ।
कारोबार जूगु मध्ये दकलय् अप्वः विकास बैंक समुह ३ दशमलव २२ अंकं थहां वनाः ६५९ दशमलव ७ अंकय् थ्यन। अथे हे विमा समुह नं शून्य दशमलव ४३ अंकं थहां वनाः ६०६ दशमलव ६४ अंकय् थ्यन ।
उखे सगरमाथा मर्चेण्ट बैंकिङ्ग एण्ड फाइनान्स लिमिटेडया शेयरय् ४१५/- तका दां कुहां वयेवं थुगु समुह दकलय् अप्वः ५ अंकं कुहां वयाः ६३३ दशमलव ३९ अंकय् थ्यंगु दु। जलविद्युत समुह नं शून्य दशमलव ६८ अंकं कुहां वयाः ८३१ दशमलव ८९ अंकय् थ्यन ।
नखः न्ह्यःने कारोबार बुलुहँ कुहां वयाच्वंगु इलय् छन्हु न्ह्यःया तुलनाय् म्हिगःया कारोबारय् धाःसा स्वात्त हे कुहां वल। छन्हु न्ह्यः जक छगू लाख स्वीन्याद्वः कित्ता शेयरं झिगू करोड तका बराबरया कारोबार जूगु खःसा म्हिगः न्यय्न्हय्द्वः न्हय्सः व गुंगू कित्ता शेयर न्याये-मी जुयाः स्वंगू करोड चय्स्वंगू लाख ग्वीछद्वः तका दांया कारोबार जुल ।
म्हिगः नेपाल बङ्गलादेश बैंकया दकलय् अप्वः १५,५५० कित्ता शेयर न्यायेमी जुल। कारोबार जूगु कम्पनीत मध्ये स्टायण्डर्ड चार्टर्ड बैंकं दांया ल्याखं दकलय् अप्वः चय्प्यंगू लाख ख्वीछद्वः तका दांया कारोबार याःगु दु। दकलय् अप्वः भाः कुहां वंगु सगरमाथा मर्चेण्ट बैंक एण्ड फाइनान्सं अप्वः गुमे याःगु दुसा विराटलक्ष्मी विकास बैंक लिमिटेडं दकलय् अप्वः कमे याःगु दु। मोहनि नखःया कारणं नेप्सेय् थनिनिसें वइगु विहीवाः तक कारोबार बन्द जुइगु नं नेप्से जानकारी बिउगु दु ।
