प्रहरी व टाइगर्सया कार्यकर्तात दथुइ ल्वापू, स्वम्ह सीत
सप्तरीया बैरवाय् शुक्रवाः सुथय् प्रहरी व मधेशी मुक्ति टाइगर्सया कार्यकर्तात दथुइ जूगु भिडन्तय् स्वम्ह टाइगर्सया कार्यकर्तात सीगु दु । अथेहे भिडन्तय् नीम्ह प्रहरी नं घाःपाः जूगु दु ।
जिल्ला प्रहरी ज्याकू राजबिराजं शुक्रवाः सुथय् हे छगू पत्रकार सम्मेलन यानाः गस्तीइ वनाच्वंगु प्रहरीया पुचयात टाइगर्सया कार्यकर्तातय्सं गोलीं क्येकूगु व लिपा प्रहरीं जवाफी कारवाही यावलय् स्वम्ह टाइगर्सया कार्यकर्ता सीगु खँ धाःगु दु ।
प्रहरीं सीपिं स्वम्हं थीथी अपराधया घटनाय् संलग्न जूगु खँ धाःगु दु । उपिं अपहरण, चन्दा असुली लगायत थीथी अपराधिक ज्या यानाः सर्वसाधारणयात आतंकित यानावयाच्वंगु जानकारी प्रहरीं ब्यूगु दु । प्रहरीं घटनास्थलं छपू पेस्तोल, निपू कटुवा बन्दुक, न्यागू राउन्ड गोली, मोबाइल लगायत सामान बरामद याःगु खँ नं धाःगु दु ।
टाइगर्सया संयोजक प्रतापं धाःसा युद्धविरामया ईलय् प्रहरीं थःगु पार्टीया कार्यकर्तातय्त नियन्त्रणय् कयाः स्याःगु द्वपं ब्यूगु दु ।
