'सहमतिं हे वर्तमान गतिरोधया समस्या ज्यंकेगु'
प्रमुख स्वंगू राजनीतिक दलया शीर्ष नेतातय्सं वर्तमान समस्या ज्यंकेत सहमतिया हे लँपू ल्येमाःगु खँ बः ब्यूगु दु ।
बिहीवाः निसें दाङं सेवा सुरु जूगु नेपाल स्याटलाइट टेलिकम प्रालिया हेल्लो नेपाल नांया न्हूगु मोबाल फोन सेवाया उल्लेज्या कर्न्फ्रन्स कल मार्फत यायेगु झ्वलय् नेपालीं कांग्रेसया सभापति गिरिजाप्रसाद कोइराला, एकीकृत नेकपा (माओवादी)या अध्यक्ष पुष्पकमल दाहाल 'प्रचण्ड' व नेकपा (एमाले)या महासचिव ईश्वर पोखरेलं सहिमत यानाः न्ह्या वनेमाःगु खँ बः ब्यूगु खः ।
माओवादी अध्यक्ष रोल्पां, कांग्रेस सभापति येँ व एमाले महासचिव दाङ कर्न्फन्स कल यानाः हेल्लो नेपालया उल्लेज्या याःगु खः । उगु झ्वलय् कांग्रस सभापति कोइरालां विश्वासया संकट चीकाः दक्वं दलत छप्पं जुयाः न्हूगु सहमति यायेमाःगु धयादिल । माओवादी अध्यक्ष प्रचण्डं थः आः रोल्पा जूगु व येँ लिहांवनेवं कांग्रेस सभापतियात नाप लानाः सहमतिया निंतिं सहलह यायेगु धयादिल । अथेहे एमाले महासचिव पोखरेलं सहमतिया राजनीतियात कायम यायेमाःगु व सहमतिया राजनीतिक यात्राय् सहयोगी भूमिका म्हितेत कांग्रेस सभापति कोइरालायात इनाप यानादिल ।
खँल्हाबंलाय् स्वंगूलिं दलया शीर्ष नेतातय्सं याकनं हे येँ नापलाना न्हूगु राजनीतिक सहमतिया निंतिं कुतः यायेगु बिचाः प्वंकल ।
