बजारय् नक्कली नोट व्यापक
येँ (सन्ध्या टाइम्स)/ बजारय् सामान न्यायेबलय् होश यानादिसँ, पसल्यां छितः हुलमुलय् लाकाः नकली नोट लित बिया हयेफु ।
मकवानपुरया थीथी लागाय् थौंकन्हय् नकली नोट चलनचल्तीइ वयाच्वंगु लूगु दु। थ्व झ्वलय् हेटौंडाय् खसी न्यानाः नक्कली ध्यबा बिउपिं निम्हेसित ज्वंगु दु। ज्वंपिं भारतया खसी व्यापारी सनोज हुसैन व नाजिर हुसैन खः।
उमिसं गामय् च्वंपिंके खसी न्यायेगु झ्वलय् थुकथं नक्कली नोट बीवं ज्वंगु खः। प्रहरीं उपिंपाखंे झिंखुद्वः नेपाली नक्कली नोट नं ज्वंगु दु ।
ग्रामीण व बजाः क्षेत्रय् चाःहिलाः जी, धन्या, कापःया लिसें थीथी सामान मिउ वयाच्वंपिं व्यापारीत थज्याःगु नक्कली नोटया कारोबार यायेगु ज्याय् दकलय् न्ह्यःने लानाच्वंगु दु।
थ्व बाहेक नं मकवानपुरय् नक्कली भारतीय नोट नं व्यापक रुपं खने दुगुलिं सचेत जुइत अनया बैंकतय्सं सर्वसाधारणयात इनाप याःगु दु ।
मकवानपुर लागाय् थथे नक्कली नेपाली नोट ज्वंगु धाःसा थ्व न्हापांगु घटना खः धाःगु दु ।
विशेष यानाः भारतीय व्यापारी थें च्वंक सामान मिउ वयाच्वंपिं व नेपाःमिपाखें सामान न्यायेगु धकाः वयाच्वंपिं थ्व ज्याय् संलग्न जुयाच्वंगु खँ सीदुगु दु ।
