स्वम्ह नेताया कन्फरेन्स बैठक
येँ (सन्ध्या टाइम्स)/राजनीतिक गतिरोध चीकेत सहमतिया विकल्प मदुगु खँ स्वंगुलिं प्रमुख राजनीतिक पार्टीया नेतातय्सं धाःगु
दु ।
दांगं सेवा शुरु जूगु नेपाल स्याटलाइट टेलिकम प्रालिया हेल्लो नेपाल नांया न्हूगु मोबाइल सेवाया कन्फ्ररेन्स कलपाखें उलेज्या यासें वय्कःपिंसं उगु खँ धयादीगु खः।
कन्फरेन्स कलया झ्वलय् माओवादी अध्यक्ष प्रचण्डं सहमतिया राजनीतिक विकल्प मदु धासें थः रोल्पां येँय् लिहां वयेवं गम्भीर रुपं सहलह यायेगु खँ धयादीगु खःसा कांग्रेस सभापति गिरिजाप्रसाद कोइरालां उकिया निंतिं थः लालायित जुयाच्वनागु खँ कनादीगु खः ।
उखे एमाले महासचिव ईश्वर पोखरेलं सभापति कोइराला व अध्यक्ष प्रचण्डयात सहमतिया राजनीति कायम हे यायेत सुझाव बियादीगु खः ।
उगु इलय् वय्कःपिनि दथुइ पुलांगु सहमतिया पालना यानाः न्हूगु सहमति कायम यायेमाःगु खँय् नं सहलह जूगु खः।
सभापति कोइराला येँय्, अध्यक्ष प्रचण्ड रोल्पाय् व महासचिव पोखरेल दांगय् च्वनाः उगु खँल्हाबल्हा याःगु खः ।
