माओवादीया प्यंगू विकल्प
येँ (सन्ध्या टाइम्स)/इलय् संविधान च्वयेगु ज्या मजुल धाःसा देय् अस्तव्यस्त जुइगु ख्याच्वः एमालेया महासचिव इश्वर पोखरेलं बियादीगु दु। थौं सुथय् दांगय् प्रेस चौतारी नेपालया पत्रकार सम्मेलनय् न्ववासें वय्कलं उगु खँ धयादीगु खः ।
राजनीतिक पार्टीत थःथःगु अडानय् च्वनाः संविधान दयेके मफइगु खँ कनादिसें वय्कलं उकिया निंतिं राजनीतिक सहमति जुइमाःगु खँ नं धयादीगु दु ।
माओवादीया आन्दोलन अनावश्यक खः धासें वय्कलं माओवादीया ल्हाःतय् आः प्यंगू विकल्प दुगु बिचाः नं प्वंकादिल। वय्कलं बियादीगु प्यंगू विकल्प खः - माओवादीं जनविद्रोहपाखें सत्ता कब्जा यायेगु, ३०१ म्ह सभासद् खाकाः थःगु हे नेतृत्वय् सरकार दयेकेगु, वर्तमान सरकारय् हे दुहां वयाः राष्ट्रिय सरकारय् सामेल जुइगु अथवा जिम्मेवार प्रतिपक्षी जुयाः बांलाःगु भूमिका म्हितेगु ।
ज्याझ्वलय् वर्तमान सरकारं ज्या याये मफुगु अवस्था मवःतले थ्व सरकारयात सुनां नं क्वःथले मफइगु बिचाः नं वय्कलं प्वंकादीगु खः ।
