गाडीं क्यला छम्ह सित

येँ (सन्ध्या टाइम्स)/थौं सुथय् बाराय् गाडी दुर्घटनाय् लानाः छम्ह सीगु दु। वीरगञ्जं पथलैया पाखे वनाच्वंगु ना. ४ ख १४६ नम्बरया ट्रिपरया लँय् म्हिताच्वंम्ह खुदँ दुम्ह गनीकुमार रौनियारयात ठक्कर नकेवं रौनियार घटनास्थलय् मदुगु खः। मचा क्यलाः बिसिउँ वंगु ट्रिपर व चालकयात प्रहरीं मालाच्वंगु दु। उखे वंगु मंगलवाः गाडीया ठक्करं सीपिनि छेँजःपिंसं थौं बाराया निजगढय् अवरुद्ध याःगु सतक सुचारु जूगु दु। वंगु मंगलवाः गाडीया ठक्करं भवनाथ चौलागाईं सीगु खः। सिम्हेसिया छेँजःयात क्षतिपूर्ति बीगु सहमति जुइवं यातायात सुचारु जूगु खः ।