नेप्से हाकनं कुहां वन
येँ (सन्ध्या टाइम्स)/वंगु छुं न्हि न्हयः निसें सामान्य थहां वनाच्वंगु नेप्से म्हिगः कुहां वल। छन्हु न्ह्यः कारोबार कुहां वंसां नेप्से परिसूचक थहां वंगु खःसा म्हिगः कारोबार थहां वंसा नेप्से धाःसा कुहां वल। अथे हे छन्हु न्ह्यः दक्वं परिसूचक थहां वंगु खःसा म्हिगः दक्वं कुहां वल। म्हिगः नेप्से २ दशमलव २५ अंकं कुहां वयाः ६३० दशमलव ४५ अंकय् थ्यन। सेन्सेटिभ नं शून्य दशमलव ६६ अंकं कुहां वःगु दु। फ्लोट शून्य दशमलव ३८ अंकं कुहां वल ।
छुं छुं बैंक त्वःताः अप्वः थें बैंकया शेयर भाः कुहां वयेवं नेप्से नं कुहां वंगु खः। स्टायण्डर्ड चार्टर्डया ७०/-, नविलया २०/-, इन्भेष्टमेण्ट व सिद्धार्थया १५/- कुहां वयेवं वाणिज्य समुह ३ दशमलव ९९ अंकं कुहां वयाः ६३० दशमलव ७६ अंकय् थ्यंगु दु ।
विशाल बजार कं.या शेयरय् प्रति कित्ता ५८/- तका कुहां वयेवं व्यापारिक समुह कारोबार जूगु उपसूचक मध्ये दकलय् अप्वः ४ दशमलव ९७ अंकं कुहां वयाः २६१ दशमलव ३ अंकय् थ्यन ।
अथे हे विकास बैंक समुह २ दशमलव ४८ अंकं कुहां वयाः ६५६ दशमलव ४८ अंकय् व जलविद्युत समुह शून्य दशमलव ६८ अंकं कुहां वयाः ८३२ दशमलव ५७ अंकय् थ्यन ।
थुखे फाइनान्स व वीमा समुह म्हिगः नं थहां वंगु दु। फाइनान्स समुह १ दशमलव ९ अंकं थहां वयाः ६३८ दशमलव ३९ अंकय् थ्यंगु दु। वीमा समुह नं शून्य दशमलव ३१ अंकं थहां वयाः ६०६ दशमलव २१ अंकय् थ्यन ।
नेप्से कुहां वंसां म्हिगः कारोबार धाःसा गाक्कं थहां वंगु दु। छन्हु न्ह्यः न्यागू करोडया कारोबार जूगु नेप्सेय् म्हिगः उकिया दुगंछि थहां वनाः झिगू करोड झिंप्यंगू लाख नीन्हय्द्वः तका दांया कारोबार जुयाः छगू लाख स्वीन्याद्वः प्यसः व स्वीनिगू कित्ता शेयर न्याये-मी जुल। थ्व स्वयां न्ह्यःया कारोबारय् ख्वीप्यद्वः गुसः व नीन्हय्गू कित्ता शेयर न्याये-मी जूगु खः। न्यय्न्यागू कम्पनीया कारोबारय् नीनिगू कम्पनीया शेयर भाः कुहां वंगु दु। झिंखुगू कम्पनीया थहां वंगु दुसा झिंन्हय्गू कम्पनीया भाः यथावत जुल।
म्हिगः नं दांया ल्याखं दकलय् अप्वः स्टायण्डर्ड चार्टर्डं कारोबार याःगु दु। स्टायण्डर्डं म्हिगः प्यंगू करोड स्वीखुगू लाख नीनिद्वः तका दां कारोबार याःगु दु। मेखे विजनेश डेभलपमेण्ट बैंकं अप्वः कमे याःगु दुसा नेपाल डेभलपमेण्ट एण्ड इम्प्लोइमेण्ट प्रमोशन बैंकं दकलय् अप्वः गुमे याःगु दु ।
