एमाले पाखें माओवादीयात प्यंगू विकल्प
सत्तारुढ नेकपा (एमोल)या महासचिव ईश्वर पोखरेलं प्रमुख प्रतिपक्षी दल एकीकृत नेकपा (माओवादी)यात प्यंगू विकल्प ब्यूगु दु । वयेकलं माओवादीयात की सहमतिलय् वा मखुसाः विद्रोह यानाः सत्ता कब्जा यायेत न्हापांग विकल्प बियादीगु दु । तर विद्रोह यानाः कब्जा याःगु सत्ताया परिणाम गज्याःगु जुइगु बारे धाःसा न्हापा हे बिचाः यायेत नं वयेकलं माओवादीयात इनाप यानादिल ।
प्रेस चौतारी दाङं बिहीवाः घोराहीलय् याःगु पत्रकार सम्मेलनय् न्ववानादिसें महासचिव पोखरेलं माओवादीं व्यवस्थापिका संसदय् ३०१ मत हयाः बहुमतया साथ सरकार गठन यायेमाःगु निगूगु विकल्प जूगु धयादिल । तर वयेकलं माओवादीं बहुमत हयाः सरकार निर्माण याइगु सम्भावन मदुगु धयादिल ।
अथेहे वयेकलं माओवादीया मेगू विकल्प कि सहमति यानाः वर्तमान सरकारय् ब्वति कायेमाः धयादिल । वयेकलं यदि माओवादी थ्व सरकराय् वसाः संविधानसभाय् माओवादीया प्रतिनिधित्व कथं संख्यात्मक हिसावं मन्त्रालय बीफइगु धयादिल ।
नेता पोखरेलं माओवादीया लिप्पांगु विकल्प कथं जिम्मेवार प्रतिपक्ष जुयाः च्वनेगु जूगु धयादिल । वयेकलं माओवादी नाप थ्व प्यंगु बाहेक मेगू विकल्प मदुगु धयादिसें न्ह्याःगु याःसां माओवादीं थ्वहे प्यंगू विकल्प मध्ये पाखें छगू ल्यय् माः धयादिल ।
वयेकलं माओवादी थःगु हे कारणं सरकारं पिहांवनेमाःगु धयादिसें माओवादीं दुने छगू खँल्हाइगु व पिने मेगू हे खँल्हाइगु कारणं हे सहमतिया राजनीति स्यंगू द्वपं बियादिल ।
