मोहनी लिपा सहमति जुइगुलि खनाल आशावादी

सत्तारुढ नेकपा (एमाले)या अध्यक्ष झलनाथ खनालं वर्तमान राजनीतिक गतिरोधया निकास मोहनि लिपा पिहांवइगु खँ धयादीगु दु ।

काजिकिस्तानय् जुइत्यंगु एशियाली राष्ट्रतय् न्याक्वःगु अन्तर्राष्ट्रिय सम्मेलनय् ब्वति कायेत उखे पाखे झाय्न्ह्यः त्रिभुवन अन्तर्राष्ट्रिय विमानस्थलय् पत्रकारत लिसें खंल्हाबंला यानादिसें अध्यक्ष खनालं मोहनि लिपा वर्तमान गतिरोध अन्त्य जुइगु खँय् थः आशावादी जूगु धयादिल ।

मोहनि धुनेवं हे प्रमुख पार्टीत दथुइ गम्भीर वार्ता जुइगु व अज्याःगु वार्तां सहमति जुइगु खँ वयेकलं धयादिल । खनालं ईलय् हे संविधान निर्माण यायेत प्रमुख दलत दथुइ सहमति आवश्यक जूगु धयादिसें सरकारया नेतृत्व सुनां याइगु धइगु खँ महत्वपूर्ण मजूगु धयादिल । वयेकलं राष्ट्रया प्रमुख एजेण्डा संविधान निर्माण खः सरकारया नेतृत्व मखु धयादिल ।