न्यूयोर्कय् नं प्रधानमन्त्री व्यस्त
येँ (सन्ध्या टाइम्स)/ संयुक्त राष्ट्रसंघया ६४ क्वःगु महासभाय् ब्वति कायेत अमेरिका झाःम्ह प्रधानमन्त्री माधव नेपालं नेपाःया निंतिं महत्वपूर्ण निगू ज्याझ्वःयात संवोधन यानादीगु ज्याझ्वः दु ।
वय्कलं थौं अमेरिकी राष्ट्रपति बाराक ओबामां ग्वसाः ग्वःगु शान्ति स्थापनाया सेना व प्रहरी छ्वयेगु झिगू देय्या बैठकय् संवोधन यानादी। शान्ति सेना छ्वइगु देय्या धलखय् नेपाः न्यागूगु ल्याखय् लाः बैठकय् शान्ति स्थापना यायेगु निंतिं विश्वय् खने दुगु हाथ्या व भावी दिशाया बारे झिगू देय्या प्रतिनिधितय् दथुइ सहलह जुइ ।
अथे हे प्रम नेपालं थौं बेलायती प्रधानमन्त्री गोर्डन ब्राउन व विश्व बैंकया अध्यक्ष रोबर्ट जुलिकं ग्वसाः ग्वःगु ज्याझ्वलय् नं संवोधन यानादी। 'इन्भेस्टिङ इन आवर कमन फ्युचर, हेल्दी वुमन, हेल्दी चिल्ड्रेन' नांगु उगु ज्याझ्वलय् मातृशिशु क्षेत्रय् न्ह्यथनेबहःगु ज्या यानाच्वंगु देय्या निंतिं ग्वसाः ग्वःगु खः ।
अथे हे वय्कलं बुर्किनाफासो व इथोपियाया राष्ट्रपतिपाखें मंकाः कथं ग्वसाः ग्वःगु 'मां व मचायात एड्सपाखें बचे या' व 'कल टु एक्सन' विषयक बैठकय् नं ब्वति कयादीगु ज्याझ्वः दु ।
वय्कलं राष्ट्र संघया महासचिव वान कि मुनं ग्वसाः ग्वःगु वन विनाश गुकथं पनेगु धइगु विषयया अन्तर्क्रियात्मक ज्याझ्वलय् नं ब्वति कयादी ।
