एमाले बैठकय् माओवादीया चर्चा
येँ (सन्ध्या टाइम्स)/वर्तमान राजनीतिक गतिरोध ज्यंकेगु निंतिं सहलह यायेत थौं एमालेया स्थायी समितिया बैठक च्वंगु दु ।
थौंया बैठकय् प्रमुख प्रतिपक्ष माओवादीया मागयात गुकथं ज्यंकेगु धइगु बारे सहलह केन्द्रित जूगु खँ एमालेया सम्बद्ध सूत्रं धाःगु दु ।
बैठकं राजनीतिक सहमति कायम यायेगु निंतिं थीथी दललिसे सहलह यायेगु निंतिं नेता भरतमोहन अधिकारीया संयोजकत्वय् न्हय्म्ह दुजः दुगु छगू समिति नं स्वंगु दु। अथे हे बैठकय् पार्टीया थीथी जिल्लाय् ब्वलनाच्वंगु विवाद व निर्वाचन याये ल्यंदुगु जिल्लाय् निर्वाचन यायेगु बारे नं सहलह जूगु खँ सीदुगु दु ।
बैठकय् एमाले अध्यक्ष झलनाथ खनालं यानादीत्यंगु काजिकिस्तानया भ्रमणयात कयाः नं सहलह जूगु खः। एमाले अध्यक्ष खनाल एशियाली राष्ट्रतय् न्याक्वःगु अन्तर्राष्ट्रिय सम्मेलनय् ब्वति कायेत थौं काजिकिस्तान झाइगु ज्याझ्वः दु ।
