कारोबार क्वय् नेप्से च्वय्
येँ (सन्ध्या टाइम्स)/नखः न्ह्यःने वःलिसे नेपाल स्टक एक्सचेन्जय् शेयर कारोबार नं बुलुहँ कुहां वयाच्वंगु दु। छन्हु न्ह्यः मुस्मांतय् नखःया कारणं कारोबार बन्द जूगु नेप्से म्हिगः दां व शेयर संख्याय् निन्हु न्ह्यःया कारोबारय् स्वयां कुहां वःगु दु। यद्यपि नेप्से परिसूचक धाःसा लिपांगु न्हिया कारोबारय् स्वयां थहां वंगु दु ।
म्हिगः स्टायण्डर्ड चार्टर्डया ९०/-, लक्ष्मी बैंकया ३७/सिटिजन्स, एभरेष्ट व नविलया शेयरय् २५/- तका थहां वनेवं नेप्से नं ३ दशमलव ८ अंकं थहां वनाः ६३२ दशमलव ७ अंकय् थ्यंगु दु। सेन्सेटिभ नं १ दशमलव १६ अंकं थहां वंगु दुसा फ्लोट शून्य दशमलव ४६ अंकं थहां वन ।
लिसें म्हिगः ताः ई लिपा जूसां कारोबार जूगु दकवं उपसूचक थहां वंगु दु। छुं छुं बैंकया कारोबार कुहां वंसां म्हिगः स्टायण्डर्ड, लक्ष्मी, नविल, एभरेष्टया शेयरय् थहां वंगुलिं वाणिज्य समुहया उपसूचक नं ४ दशमलव ८७ अंकं थहां वनाः ६३४ दशमलव ७५ अंकय् थ्यन। विकास बैंक समुह २ दशमलव ४५ अंकं थहां वनाः ६५८ दशमलव ९६ अंकय् थ्यंगु दु ।
फाइनान्स समुह शून्य दशमलव ८२ अंकं थहां वनाः ६३६ दशमलव ४९ अंकय् व विमा समुह शून्य दशमलव ७ अंकं थहां वनाः ६०६ दशमलव ३६ अंकय् थ्यन। मेखे जलविद्युत समुह पाखे कारोबार जूसा छुं हिउपाः धाःसा वःगु मदु। अथे हे कारोबार कुहां वयाच्वं थें नेप्सेय् कारोबार कम्पनीया ल्यां नं कुहां वःगु दु। म्हिगः मुक्कं न्यय्निगू कम्पनीया शेयर न्याये-मी जुल ।
नेप्सेय् म्हिगः न्यागू करोड झिंन्हयगू लाख व नीच्याद्वः तका दांया कारोबार जुयाः ख्वीप्यद्वः गुसः व नीन्हय्गू कित्ता शेयर न्याये-मी जुल। म्हिगः कारोबार याःगु कम्पनीत मध्ये नेपाल बङ्गलादेश बैंकय दकलय् अप्वः ८४७० कित्ता व दकलय् म्हो सिद्धार्थ इन्स्योरेन्सया २० कित्ता जक शेयर न्याये-मी जुल ।
म्हिगःया कारोबारं दकलय् अप्वः कमे याःपिं स्टायण्डर्डया शेयरधनीत हे जुलसा दकलय् अप्वः यूनियन फाइनान्सया शेयरधनीतय्सं प्रति कित्ताय् ३३/- गुमे याःगु दु।
स्टायण्डर्ड चार्टर्डं कूल कारोबारय् दांया ल्याखं दकलय् अप्वः छगू करोड न्यय्छगू लाख न्यय्स्वद्वः तका दांया कारोबार यात। नारायणी डेभलपमेण्ट बैंकं दकलय् अप्वः कमे याःगु दुसा उखे सिभिल मर्चेण्ट वित्तीय संस्थां दकलय् अप्वः गुमे याःगु दु ।
