'राष्ट्रपतियात बिन्ती यानाः माधव नेपाल प्रधानमन्त्री जूगु'
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' वर्तमान प्रधानमन्त्री माधवकुमार नेपालं राष्ट्रपतियात बिन्ती यानाः प्रधानमन्त्री जूगु द्वपं बियादीगु दु ।
बुधवाः पाल्पाया तानसेनय् जूगु छगू ज्याझ्वलय् न्ववानादिसें अध्यक्ष प्रचण्डं शाहीकालय् जुजुयात बिन्ती यानाः प्रधानमन्त्री जुइगु कुतः यासां उगु कुतः असफल जुइवं आः राष्ट्रपतियात बिन्ती यानाः माधव नेपाल प्रधानमन्त्री जूगु द्वपं बियादिल ।
वयेकलं माओवादीयात चुनावय् दकलय् अप्वः मत बिया जनतां सरकारया नेतृत्व यायेत व मेमेगू दलयात माओवादीया ल्यूल्यू जुइत जनमत ब्यूगु धयादिसें सभासदत न्यानाः बूपिं सरकारया नेतृत्वय् थ्यंगु धयादिल । वयेकलं बूपिसं हे सरकारया नेतृत्व याइगु खसा: चुनावया छु महत्व धकाः न्ह्यसः नं न्यानादिल ।
कांग्रेस व एमाले संसदय् अल्पमतय् लायेधुंकूगु दाबी नं अध्यक्षं प्रचण्डं यानादिल । वयेकलं पुलांपिं नेतातय् मानसिकता अझ नं पुलांगु हे जूगुलिं समस्या खनेदुगु धयादिसें आः जनतां हे न्हूगु अपेक्षा यानाच्वंगुलिं जतना हे अज्यापिं नेतातय्त ख्यानाछ्वइगु दाबी यानादिल ।
२०३६ सालय् थः पाल्पाय् वयागु ई स्वयां आः यक्व हे विकास जुइधुंकूगु धयादिसें वयेकलं न्हगु नेपाल निर्माणया निंतिं पाल्पाया पर्यटन विकास महत्वपूर्ण जूगु धयादिल । वयेकलं नेपाःयात 'ड्युटी फ्रि' देया कथं विकास याःसा जक विकास सम्भव जुइगु बिचाः नं प्वंकादिल ।
