बँपसः चीकेथाय् स्वनिगःवासी नं जायेमाः

येँ महानगरपालिकापाखें स्वनिगःया थीथी लागाया फुटपाथ त्यलाः बँपसः तयाच्वंपिंत चीकेगु लागिं अभियान शुरु याःगु दु । थ्व अभियानया झ्वलय् आपालं थासय् मनपाया नगर प्रहरी व पसः तईपं पसल्यातय् दथुइ ल्वापु नं जूगु दुसा आः थ्व बँ पसल्यात जानाः थ्व ज्याया मंकाः रुपं विरोध यायेगु कुतः जुयाच्वंगु दु । लिसें उमित हे हःपाः बी कथं थीथी राजनीतिक पार्टीया नेतातय्सं मनपाय् फोन यानाः बँपसः चीकेगु ज्या दिकेमाल धकाः दवाव बीगु शुरु याना हल धइगु समाचार नं पिहां वःगु दु । थ्व तसकं दुःखपूर्ण खँ खः ।

फुटपाथय् तयातःगु बँपसः चीकेगु लागिं मनपां गुगु अभियान शुरु याःगु खः उकियात च्वछायेमाः । स्वनिगःवासीतय्सं ला उकियात अझ थः हे सक्रिय जुयाः ग्वाहालि यायेमाःगु दु । फुटपाथय् तयातःगु बँपसलं सतक त्यःगु जक खँ मखु । थ्व पसलं स्वनिगलय् छता मखु तःता कथंया समस्यात दुकयाच्वंगु दु । उिकं नं थ्व ज्यायात पनेमाःगु तःधंगु आवश्यकता दु । अन बँपसः तयेगु सुयां अधिकारया खँ मखु । उिकं अन पसः तईपंत येँया प्रशासनं विकल्प बीमाःगु छुं आवश्यकता नं मदु । उमित विकल्प बीगु धइगु स्वनिगःया छगू थासय् ब्वलंगु समस्या हानं मेगु थासय् ल्ह्ययेगु थें जक जुइ ।

गन तक चीकल धकाः उमिसं विरोध ज्याझ्वःया तयारी यानाच्वंगु खँ दु उकियात स्वनिगःया स्थानीय जनतां प्रतिकार यायेमाःगु आवश्यकता दु । स्वनिगः ल्यंकेगु न्हापांगु दायित्व स्वनिगःमियागु जुइ ।

More Stories Like this