संविधानसभाया म्याद थप यायेत संशोधन दर्ता
संविधानसभां निर्धारित ईया दुने संविधान जारी यायेमफुसाः वइगु संकटया बारे संविधान संशोधन प्रस्ताव दर्ता याःगु दु ।
सभासद् सरित गिरीं संविधानसभा सचिवालयलय् 'गैरसरकारी विधेयक'या कथं दर्ता याकूगु उगु संशोधन प्रस्तावय् देशय् संकटकाल लगेजूगु अवस्थाय् संविधान निर्माणया ज्या स्वतः स्थगित जुइगु प्रावधान दुथ्याकेमाःगु खँ न्ह्यथंनातःगु दु ।
संविधान सभां वइगु जेठ १४ गते कुन्हु न्हूगु संविधान जारी यायेगु न्हि क्वछिनातःगु खसां लिप्पांगु ईलय् राजनीतिक दलत दथुइ स्यनावनाच्वंगु स्वापूया कारणं ईलय् हे संविधान निर्माण जुइत थाकूइगु खनेदुगु ईलय् थंज्याःगु संशोधन विधेयक दर्ता जूगु खः ।
दर्ता जूगु संशोधन प्रस्तावय् दलत दथुइ सहमतिया अभावया कारणं संविधान निर्माण यायेगु ज्या ईलय् हे मजूसाः संविधानसभां प्रस्ताव पारित यानाः संविधानसभाया कार्यकाल खुलाः थप यायेगु प्रावधान दुथ्याकेमाःगु खँ न्ह्यंथनातःगु दु । अन्तरिम संविधानय् धाःसा संकटकाल लगेजूगु ईलय् जक खुलाः थप याये फइगु व्यवस्था दु ।
संविधानसभाया सचिवालय्लय् प्रस्ताव दर्ता यायेधुंका सभासद गिरीं संकटकाल लागू जूसाः नागरिक अधिकार कुण्ठित जुइगु व थ्व अवस्थाय् संविधान निर्माण जुइफइगुलिं संकटकालया अवधि दुने संविधान निर्माण हे स्थगित यायेमाः धयादिल । वयेकलं संकटकाल लागू मयासें हे संविधानसभाया समयावधि थप यायेमाःगु बिचाः नं प्वंकादिल ।
