उत्तर-दक्षिण मिलेयाना प्रदेश विभाजन यायेमाः : कांग्रेस सभापति
नेपाली कांग्रेसया सभापति गिरिजाप्रसाद कोइरालां संघीयताय् देययात यंकेवलय छगू हे राज्य दुने हिमाल, पहाड व तराईया भू-भागयात दुथ्याकेमाःगु बिचाः प्वंकादीगु दु ।
मंगलवाः येँय् जूगु छगू ज्याझ्वलय् न्ववानादिसें कांग्रेस सभापति कोइरालां पूर्व-पश्चिम मखसें उत्तर-दक्षिण भू-भाग दुथ्याकाः प्रदेश विभाजन यायेगु खः धयादिल । वयेकलं थुकीया बारे भारत नाप नं थःम्हं सहलह यानाच्वंगु खुलासा यानादिल । वयेकलं प्रदेश निर्माण यायेवलय् उत्तर-दक्षिण यात मिलेयाना प्रदेश निर्माण यायेगु बारे भारत नाप सहलह जुयाच्वंगु धयादिल ।
पत्रकार पुरुषोत्तम बस्नेतं च्वयादीगु 'नेपाली कांग्रेसया प्रारम्भिक इतिहास' सफूया विमोचन यानादिसें कांग्रेस सभापति कोइरालां मधेशी दलतय्सं माग यानाच्वंगु 'एक मधेश एक प्रदेश' प्रति असहमति प्वंकादिसें नेपाःया भौगोलिक विविधता कथं हिमाल, पहाड व तराई दक्वं प्रदेश दुने लायेमाःगु थःगु मान्यता दुगु धयादिल ।
कोइरालां देय्या राजनीतिक संरचना बेलायती 'वेस्टमिनिस्टरियल' शैलीया जुइमाःगु खँय् नं बः बियादिल । वयेकलं थःयात 'प्रेसिडेन्टियल' संरचनाय् विश्वास मदुगु धयादिसें वेस्टमिनिस्टरियल शैलीलय् जनतां ल्यःगु संसदं कार्यकारी सरकार गठन यायेमाःगु व संसद दकलय् शक्तिशाली जुइमाः धयादिल ।
