अर्थपाखें दां निकासा रोक्का
येँ (सन्ध्या टाइम्स)/माओवादीं निरन्तर रुपं सदनया बैठक अवरुद्ध याना वयाच्वंगुलिं बजेट तकं पारित जुइ मफयेवं अर्थ मन्त्रालयं मोहनिया इलय् निकासा रोक्का याःगु दु। मन्त्रालयं देय्न्यंकंया कोष तथा लेखा नियन्त्रण ज्याकुथी पौ च्वयाः निकासा रोक्का याःगु खः ।
पेश्की ऐन २०६६ कथं विनियोजन विधेयक पारित मजूतले कूल विनियोजित बजेटया स्वब्वय् छब्व जक खर्च याये दइगु नियम दुगुलिं निकासा रोक्का यानागु खँ अर्थ मन्त्रालयया राजश्व सचिव कृष्णहरि बाँस्कोटां कनादीगु दु ।
थुकिं यानाः मोहनि लिपा च्वनीगु बैठक लिपा नं विनियोजित बजेट पारित मजुल धाःसा देय्या फुक्कं योजना, आयोजना जक ठप्प जुइगु मखुसें कर्मचारीतय्त तलब तकं नके मफइगु अवस्था ब्वलनीगु खँ नं सम्बन्धित विज्ञतय्सं धाःगु दु ।
सदन सुचारु जुयाः असोज तक बजेट पारित मजुल धाःसा सरकारं राजश्व असुली, प्रशासनिक व विकास खर्च याये मखनीगु खँ नं विज्ञतय्सं धाःगु दु ।
उखे सचिव बाँस्कोटां धाःसा राजनीतिक दलतय् दथुइ सहमति जुयाः विनियोजन यानातःगु बजेट पारित जुइगु विश्वास प्वंकादीगु दु ।
विनियोजित बजेट बाहेक सरकारं जर्मनी, अस्टे्रलिया,
जापान, स्वीट्जरल्याण्ड लगायतया देय्त लिसे याःगु वैदेशिक सहयोग सम्बन्धी सम्झौता व सन्धीयात अनुमोदन यायेगु प्रक्रिया तकं प्रभावित जुइगु खँ धाःगु दु।
थुकिं देय्या विकास प्रक्रियाय् तकं लिच्वः लाये फइगु खँ नं सम्बन्धित विज्ञतय्सं धाःगु दु ।
