नेकां नेवाःतय् लोकतान्त्रिक दबू
येँ (सन्ध्या टाइम्स)/ माओवादी, एमाले लिपा आः नेपाली कांग्रेसं नं नेवाः भातृ संगठन चायेकूगु दु। म्हिगः कांग्रेस समर्थित नेवाः कार्यकर्तातय् छगू मुँज्या च्वँसें थुकिया गठन याःगु खः ।
'लोकतान्त्रिक नेवाः दबू' नां तयाः नीस्वंगु उगु पुचःया नायः पदय् गजेन्द्रमान मानन्धर च्वनादीगु दु। दुजलय् भगवानरत्न शाक्य, मदनेश्वरानन्द वैद्य, वीरेन्द्रभक्त श्रेष्ठ, शैलेश शाक्य बरेजु, राममान सिं, महेन्द्रमान सिं, राजु शाही, अशोक वज्राचार्य, जगदिश नेपाली, जोत्सना सिन्दुराकार, डा. कुसुम शाक्य, डा. अनुप श्रेष्ठाचार्य, राजभाई मानन्धर, अरुण व सागर पुतुवार च्वनादीगु दु ।
न्हूदँ समारोह समितिया पुलांम्ह नायः उत्तमनारायण श्रेष्ठया सभापतित्वय् च्वंगु उगु मुँज्याय् हितकरवीर सिंह कंसकार, सभासद् तीर्थराम डंगोल, ध्यानगोविन्द रंजित, नरहरि आचार्य, वीरेन्द्रभक्त श्रेष्ठ व नविन चित्रकारपिंसं नुगःखँ प्वंकादीगु खः ।
लोकतान्त्रिक नेवाः दबूया उद्देश्य नेवाःतय् थाय्, बाय् व भाय्या संरक्षण यायेगु खः। न्हापांनिसें कायम जुयाच्वंगु नेवाःतय् लागा नेपालमण्डलया संरक्षण यायेगु व थ्व बारे मथूपिंत ध्वाथुइका वनेगु नं दबूया उद्देश्य खः धाःगु दु। दबूपाखें नेवाःतय् हक हित संरक्षणया लागिं न्ह्याम्हलिसे नं जानाः ज्या याना वने फइगु नीति कायेगु खँ नायः मानन्धरं कनादीगु दु ।
