अवैध चिठ्ठा संचालनया अनुगमन
येँ (सन्ध्या टाइम्स)/नखःया इलय् थीथी कथंया लोभ क्यनाः राफल चिठ्ठा व उपहार योजना संचालन याइपिं स्थानीय क्लबयात नियन्त्रण याइगु जूगु दु ।
थुकिया निंतिं जिल्ला प्रहरी कार्यालयं थनिंनिसें अनुगमन नं याइगु जूगु दु। विशष यानाः कर मपुसे व जिल्ला प्रशासन कार्यालयपाखें स्वीकृति मकासे थुकथं लँय् लँय् स्टल तयाः संचालन यानाच्वंगु चिठ्ठा व उपहार कार्यक्रमयात विशेष रुपं अनुगमन यायेगु ज्या न्ह्याकेत्यंगु खः ।
येँ जिल्ला प्रहरी कार्यालयं बिउगु जानकारी कथं थज्याःगु योजना संचालन याइपिंत कानूनी दायराय् हयाः कारवाही यायेगु निंतिं प्रक्रिया न्ह्याकेधुंकूगु दु ।
स्थानीय प्रशासन ऐन कथं जिल्ला प्रशासनया स्वीकृति मकासे थुकथंया चिठ्ठा व उपहार योजनात संचालन याये मदु। तर नं मोहनि व स्वन्ति नखःया झ्वलय् अप्वः थें अतिकं व्यस्त जुयाच्वनीगु थाय् कमलादि, न्हूसतक, वंघः लगायतया थासय् थुकथंया योजनात संचालन यानाः करोडौं तकाया कारोबार याना वयाच्वंगु दु ।
अथे हे व्यस्त बजाः व सतक सिथय् च्वना लंगूरबुर्जा म्हितकाच्वनीपिंत प्रशासनं वास्ता मयाःगु धायेवं आः थुखेपाखे नं कडा रुपं निगरानी तयेगु खँ जिल्ला प्रहरी कार्यालयं धाःगु दु ।
