माओवादीया मागय् लचकता क्यनेत कांग्रेसयात एमालेया इनाप
एकीकृत नेकपा (माओवादीं) तयाच्वंगु मागया बारे लचकता क्यनेत नेकपा (एमाले)या अध्यक्ष झलनाथ खनालं नेपालीं कांग्रेसया सभापति गिरिजाप्रसाद कोइरालायात इनाप यानादीगु दु ।
मंगलावाः कांग्रेस सभापति कोइरालाया छेँ महाराजगञ्जय् थ्यंकादिम्ह खनालं माओवादीयात सहमतिलय् ह्येत यायेफइगु गृहकार्यया विषयलय् सहलह यानादीगु खः । कोइरालां धाःसा उच्चस्तरिय राजनीतिक संयन्त्र निर्माण यायेमाःगु थःगु पुलांगु हे अडानयात मंगलवाः जूगु सहलहलय् नं हानं तयादिल । अथेहे कोइरालां मोहनि धुनेवं हे संयन्त्र गठन व माओवादीया मागया विषयलय् सहलह जुइमाःगु बिचाः प्वंकादिल ।
माओवादीं राष्ट्रपतिया कार्य क्षेत्रया बारे सहलह यायेगु शर्तय् संसदया गतिरोध अन्त्य यायेगु व आन्दोलन दिकेगु खँ धयाच्वंगु दु । एमालें थुकी सहमति क्यंसां कांग्रेसं धाःसा राष्ट्रपतिया विषयलय् सहलह यायेमफइगु अडान कयाच्वंगु दु ।
